LXXII. - LXXIII.

Qui me diroit: «Qui te faict mectre Si très-avant ceste parolle, Qui n'es en Théologie maistre? A toy est presumption folle.» --C'est de JESUS la parabolle, Touchant le Riche ensevely En feu, non pas en couche molle, Et du Ladre, de dessus ly.

Si du Ladre eust veu le doy ardre, Jà n'en eust requis refrigère, N'au bout d'icelluy doiz aherdre, Pour refreschir sa maschouëre. Pions y feront mate chère, Qui boy vent pourpoinct et chemise: Puys que boyture y est si chère, Dieu nous garde de la main mise!

LXXIV. [P. 53]

Ou nom de Dieu, comme j'ay dit, Et de sa glorieuse Mère, Sans peché soit parfaict ce dict Par moy, plus maigre que chimere; Si je n'ay eu fièvre effimère, Ce m'a faict divine clémence; Mais d'autre dueil et perte amère Je me tays, et ainsi commence: