CHAPITRE Xr

nous nous voyons estre environnez? Ne sont-ce pas aussi tels dangers qui nous apprennent à nous tenir sur nos guardes? Or sçavons-nous que toute nostre aide ne vient que d'enhaût, et qu'il n'y a nul bien guardé que celuy que Dieu guarde : ainsi autant de récits que nous oyons faire de ceux qui ont commis des crimes si exécrables, nous doivent estre autant d'advertissemens pour nous recommander de plus en plus à luy, et le prier tant plus ardemment qu'il luy plaise ne nous laisser en nostre naturel, comme s'il nous mettoit la bride sur le col : ains nous la tenir roide, et nous avoir tousjours en sa sauvegarde et protection, ainsi que nous voyons les petits enfans, tant plus ils ont peur, tant plus avant se cacher au giron de leurs mères. Car comme toutes et quantes fois que nous voyons un homme qui ha quelque imperfection en son corps, soit grande ou petite, advenue par tel ou tel accident, nous sommes contrains de remercier Dieu, qui nous en a préservez jusques à l'heure présente, en confessant que nous sommes subjects à pareils dangers : ne nous est-il pas force semblablement, quand nous voyons un homme s'estre oublié en une sorte ou autre, de rendre grâces à Dieu de ce que par son bon plaisir il nous a guarantis jusques à l'heure de tel inconvénient? et ce-pendant recognoistre et confesser que nous sommes du mesme bois, et que quant à estre exemts de tel danger, nous n'en avons point de lettre, sinon qu'autant qu'il nous fera la grâce de marcher sous sa crainte, et qu'il ne permettra que cest ennemi mortel ait tel avantage sur nous? Or si le discours que nous avons entrepris nous monstre évidemment et par les effects que cest ennemi s'est renforcé de nostre temps, ne nous sert-il pas par mesme moyen d'une belle remonstrance à ce que nous facions mieux le guet, et nous armions tant mieux des armes

l58 APOLOGIE POUR HERODOTE

que l'Escriture nous enseigne? Aussi voyons-nous que de tout temps et en toutes sortes de religion les crimes ont esté punis publiquement. Mais au lieu que les payens en ce faisant n'ont eu esguard qu'à une chose, à-sçavoir de faire punition exemplaire des malfaictcurs (c'est à dire, d'en faire telle punition qui servist d'exemple pour l'advenir de craindre la rigueur de justice), il est certain que les Chrestiens ont reguardé plus avant, et ont eu considération des choses susdictes. Il est bien vrai que leur intention a esté de faire que ceux qui ne pourroyent estre retenus par la crainte de Dieu, le fussent par la crainte des hommes, c'est-àdire par la crainte de l'exécution de la justice, et des tourmens convenables à la grandeur des forfaicts. Car nous sçavons que les payens ont dict il y a long temps :

Oderunt peccare boni virtiitis amore, Oderiint peccare mali formidine pœnœ (i).

C'est à dire :

Le bon craind de pécher pour l'amour de vertu, Le meschant, de pécher, de peur d'estre batu.

A quoy aussi s'accordent les Chrestiens : sinon qu'ils usent d'autre façon de parler, disans que la cause pour laquelle les bons ne s'addonncnt point à pécher, c'est la crainte de Dieu qu'ils ont devant les yeux : qui est une crainte procédante d'amour, et vrayement filiale, non point servile : comme le bon enfant craind son père, c'est à dire, il a peur de l'offenser pour l'amour

(i) Horace, Ep. 1, XVI, v. 52; le second vers se lit ainsi: Tu nihil admittes in te formidine pœnce.