XVIII INTRODUCTION

constances de quelques faicts dont la mémoire est ja presque perdue, combien qu'ils soyent avenus seulement un peu devant nostre temps ou bien mesmes en iceluy ?

Je vien maintenant à celuy qui n'a pas dict du mal de mon livre, mais luy a faict du mal : voire tel mal qui pour l'avenir peut donner à plusieurs personnes nouvelles occasions d'en mesdire. Pour à quoy obvier, en tant qu'en moy sera, je suis contrainct d'avertir les lecteurs de ce qui luy est avenu : je di, à mon livre. Joinct qu'il est question du tort faict au public, et non à moy particulièrement : et pourtant ne peut en bonne conscience estre celé. Parquoy, ce que j'en diray, ce sera avec protestation d'oublier ce qui concerne mon particulier (comme aussi j'ay, grâces à Dieu, les reins assez forts pour porter un dommage beaucoup plus grand que celuy qu'on m'a pensé faire) et d'imputer ce qui a esté faict, à un' avarice aveuglée, plustost qu'à aucune malveillance. Et quand bien mesmes j'imputerois à malveillance le tort qu'on m'a pensé faire, et que j'oublirois quel est le devoir de Chrestien en tel cas, au moins devroy-je ensuivre la patience de Socrates, qui estant outragé par un gros piquebeuf et homme de néant, respondit à ceux qui luy conseilloyent de s'en faire faire raison. Prenez le cas qu'un asne m'ait frappé : me direz-vous que je m'en face faire raison? Mais pour ne perdre temps, voici de quoy il faut que vous lecteur soyez averti. Depuis environ un mois a esté publiée un'impression de mon livre susdict, intitulé : L'introduction au traité, etc., en la première page duquel on a mis les noms de la ville et de l'imprimeur, mais supposez : car il-y-a, Eyi Anvers par Henrich Wandellin : combien qu'il ait esté imprimé à Lyon par un que je ne nommeray point, mais pour un qui a nom Claude Ravot,