INTRODUCTION XVII

pouvoir trouver vray en aucunes, toutesfois en peu. Mais il-y-a différence d'ignorer un faict, et d'ignorer une circonstance d'iceluy. Ce qui est d'autant plus pardonnable, que nous voyons aujourdhuy en France la certitude de plusieurs choses estre perdue et comme ensevelie du jour au lendemain. Sur quoy j'allegueray pour un exemple fort familier, ce mot Huguenot, qui trotte tant aujourdhuy par la bouche de plusieurs : et à grand' peine de cinq-cens qui en usent, les cinq sçauroyent-ils dire dont il est venu. Je laisseray ceux qui pensent que ce soit quelque mot Allemand, ou pris de quelque autre pays estrange : et viendray à ceux qui pensent parler plus pertinemment, et en rendre quelque bonne raison. Les uns croyent qu'il vient de Joannes Hus, les autres tiennent pour seur qu'il a son origine de Hugues Capet. Les autres disent qu'il est pris d'un nommé Hugues, en la maison duquel on commança à prescher secrettement à Tours : mais les autres maintiennent que c'estoit le prescheur qui avoit ce nom. Aucuns disent que Hugues du nom duquel a esté forgé ce mot Huguenot, estoit un fol courant les rues en quelque ville de France. Il-y-a encore un'opinion qui est la moins divulguée, et qui toutesfois est la vraye : c'est que ce mot Huguenot est pris du roy Huguon, qui vaut autant à dire à Tours .'qu'à Paris le Moine bourré. Et celuy qui de Huguon dériva Huguenot, fut un moine, qui en un presche qu'il faisoit là, reprochant aux Luthériens (ainsi qu'on les appeloit lors) qu'ils ne faisoyent l'exercice de leur religion que de nuict, dit qu'il les falloit doresnavant appeler Huguenots, comme parens du roy Huguon, en ce qu'ils n'alloyent que de nuict non plus que luy. Que si il est tant malaisé de trouver la vérité d'une chose qui est non seulement de nostre temps, mais de fraische mémoire, nous devons-nous tant formalizer pour des cir-