CHAPITRE XV

Des larrecins de nostre temps.

, VANT qu'entrer en propos des larrecins et toutes sortes de pilleries, j'useray de ceste petite préface : que si nostre siècle surmonte de beaucoup tous les précédens es autres meschancetez, encore plus en ceste-ci. Car je di (et pense dire vray) que qui voudra prendre garde de près à toutes les sortes de piller et desrobber, ou pour le moins de prendre hardiment, qui sont maintenant en usage, on trouvera le nombre des façons de desrobber estre quasi aussi grand qu'estoit le temps passé le nombre des larrons. Et la raison est apparente : c'est d'autant que le larrecin est celuy d'entre tous les vices qui requiert plus le bon esprit (à l'occasion dequoy il estoit permis par les loix des Lacédémoniens, pourveu qu'on n'y fust point surpris), duquel nous voyons les hommes de nostre temps estre mieux pourveus en comparaison que n'ont esté leurs prédécesseurs, si nous en voulons juger par les effects. Et ce bon esprit (c'est à dire vif et agu) s'applicque à mal plustost qu'à bien, encore plus, tant pour tant, que du temps de nos ancestres. Or nous sça-

vons qu'il y a assez long temps qu'on a faict ceste plainte,

Uyide habeat quœrit nemo, sed oportet habere (i).

C'est à dire,

Chacun dit qu'il en faut avoir, Mais d'où, il n'en veut rien sçavoir.

Nous confessons aussi que ce proverbe est ancien, Lîicri bonus odor ex re qualibet (2), c'est à dire, que l'odeur du gaing est bonne, de quelque lieu qu'il vienne. Par où nous congnoissons que jamais on n'a eu faute de volonté d'en avoir : mais nostre siècle, avec une plus grande volonté, voire un plus ardent désir, a apporté aussi des moyens beaucoup plus grans : comme ainsi soit que les hommes de nostre temps ayent premièrement tenu ceste reigle pour infallible, que pour devenir riche il faut tourner le dos à Dieu, et l'ayent prattiquée très-bien : outre ce ayent faict leur proufit de toutes les inventions de leurs prédécesseurs : finalement ayent employé le don spécial de leur plus grande promptitude et dextérité d'esprit. Or ne se faut-il esmerveiller si de tout temps plusieurs se sont meslez du mestier de larrecin, veu que jamais n'a esté homme qui n'ait cerché les moyens de vivre : et une grand part d'iceux se voyant destituée (ce luy sembloit) de tous autres, ait voulu avoir recours à cestuy-ci. Mais dont vient que de tout temps les gros larrons ont esté plus espargnez que les petis, voire que les gros

(1) Unde habeas, etc. Juvénal, sat. XIV, v. 207.

(2) « Reprehendenti filio Tito quod etiam urinœ vectigal commentus esset, pecuniam ex prima pensione admovit ad nares, sciscitans num odore offenderetur, et illo negante : Atquin, inquit, e lotio est. » Suétone, Vespas., XXIII.