CHAPITRE XVIII 36 I

en ce temps-là. Mais le mal-heureux, ayant ce qu'il demandoit, luy mit dedans la gorge la dague qu'il luy tenoit dessus : et puis se vanta de s'estre vengé de la plus belle vengeance que jamais homme avoit eue, d'autant qu'il luy avoit faict perdre l'ame aussi bien que le corps.

Je vien maintenant aux meurdres que l'avarice fait entreprendre : et di que les uns se commettent pour le salaire que donnent ceux par lesquels on est mis en besongne (suivant ce qui a esté dict ci-dessus des assasins), les autres pour avoir plus seurement la despouille de ceux qui passent leur chemin : et tels meurdriers s'appellent brigans, ou voleurs. Mais des assasins nous en avons assez parlé. Quant aux brigans, ou voleurs, pleust à Dieu qu'il n'y en eust point tant d'exemples par tout. Et de faict, que nostre siècle ait esté plus malheureux en cest endroit que les précédens, il appert par la nouvelle sorte de punition qui commença à estre en usage du règne de François premier de ce nom, et ce par un édict exprès d'iceluy. Car quand on vit que les autres supplices ne les espouvantoyent point, on avisa de les mettre sur la roue, et les y laisser languir après qu'ils seroyent rompus. Et toutesfois ceste peine n'a esté suffisante pour faire laisser le mestier à plusieurs, ni pour garder plusieurs de s'y mettre : comme ont monstre tant d'exécutions qui en ont esté faictes depuis, principalement à Paris. Entre lesquelles on tient pour mémorable celle d'un gentilhomme nommé Villievineuf, qui estoit du comté de Tonnerre, lequel avoit un serviteur luy servant d'assommeur, qui fut aussi exécuté avec luy : avoit aussi un jeune garson, qui estoit son laquays : lequel il vit fouetter, et l'assommeur brûler vif : et après ce spectacle, fut mis sur la roue. Or me faict cest assommeur souvenir d'un voleur Italien, mais exerceant ses vole-

ries (si voleries se doivent appeler) dedans les villes, et mesme dedans les maisons : au lieu que le plus souvent les autres les exercent aux champs, par les chemins : dont nous voyons que voleurs et guetteurs de chemins se prennent pour synonymes. Cest Italien, nommé Francisquino, après avoir demeuré quelque temps à Boulongne la grasse (i), en l'une des bonnes maisons de gentils-hommes qui soit là, et avoir esté tenu pour quelque honneste seigneur et de bon lieu, veu les magnificences desquelles il usoit, fut enfin descouvert mener le train que s'ensuit. C'est que sous prétexte de tenir le brelan de tous jeux de cartes et de dez (comme on sçait assez ceci estre l'ordinaire de plusieurs gentilshommes de ce pays-là, mais plus en aucunes villes qu'es autres), et sous couleur aussi d'estre fort désireux d'avoir tousjours nouvelle compagnie, et se monstrer magnifique, il se faisoit visiter par ceux-mesmes qui estoyent nouvellement arrivez en la ville. Et sitost qu'ils estoyent entrez, après leur avoir faict les caresses accoustumées au lieu, il se mettoit à jouer avec eux, commandant qu'on apprestast cependant le disner ou le soupper, ou la collation, selon l'heure qu'il estoit : mais au lieu d'apprester cela, cest assommeur s'apprestoit pour leur bailler le coup, quand son maistre Francisquino luy feroit signe. Et continua ce train si longuement, qu'on dit que quand ils furent pris, et qu'ils eurent tout confessé, on trouva en des privez quatorze ou quinze corps de ceux qui avoyent esté ainsi tuez tant par cest assommeur, que par son maistre Francisquino. En fin leur supplice fut tel : c'est qu'après avoir esté tenaillez, on leur fendit la poictrine, et au

(i) « On la nomme la Grasse, à cause de la bonté de son terroir, qui est aux extrémités de la Lombardie. » Moréri. Bœdeker dit que ce surnom vient de ce que « la vie y est opulente et la cuisine bonne. « On lit dans Gomès de Trier : Bologne la Grasse, Padoua la passe.