CHAPITRE XVIII

rançonnent le menu peuple, estre nommez coupegorges, auquel titre prennent aussi leur part toutes gens d'injustice de faict et gens de justice de nom); mais je me contenteray pour le présent des susdicts : et viendray à ceux qui sont homicides d'eux-mesmes. Les exemples desquels nous doivent beaucoup humilier, en nous monstrant combien grande puissance le diable ha sur nous, depuis que nous luy donnons quelque entrée, et ne nous tenons sur nos gardes : c'est à dire, nous ne résistons par les armes de la parole de Dieu aux tentations que le diable nous met au devant. Comme ainsi soit donc que les payons pour la plus part n'ayent point faict de conscience de se desfaire, et que mesme les philosophes presque tous l'ayent approuvé par leur sentence (et quelques uns par leur exemple aussi), au contraire la Chrestienté n'a onq esté en lieu aucun si corrompue que ceux qui ont esté homicides d'euxmesmes n'ayent esté condamnez totalement, voire mis non seulement hors du nombre de Chrestiens, mais de vrais hommes. Et toutesfois tels homicides se sont trouvez souvent entre les Chrestiens en tous siècles, si nous ajoustons foy aux histoires. Et s'il est licite de parler premièrement des femmes (suyvant ce que nous avons touché ci-dessus du faict de Lucrèce), nous lisons que du temps de Dioclétian, la mère et les deux filles se précipitèrent et noyèrent en une rivière, estans i^sous prétexte d'aller à leurs nécessitez) descendues du chariot, dedans lequel on les menoit en Antioche, pour là faire abjuration de leur religion Chrestienne, et mesme sacrifier aux dieux que commanderoit l'empereur, ou recevoir infamie en leurs personnes, et en fin punition de mort. On trouve aussi d'autres exemples de filles qui ont mieux aimé estre meurdrières d'elles mesmes qu'estre violées. Quant à nostre siècle, nous avons les oreilles batues d'exemples, tant d'hommes

que de femmes. Et entr'autres il me souvient de ce que j'ay ouy raconter d'une femme de Suysse, avenu depuis environ neuf ou dix ans : c'est qu'après avoir receu un autre en son lict en la place de son mari, quand elle s'apperceut qu'ell'avoit esté déceue, et que ce n'estoit point son mari qui avoit couché avec elle, un si grand courroux et crèvecueur la saisit qu'elle s'alla noyer. Aussi lisons-nous es narrations de la roine de Navarre dernière défuncte (i), la piteuse mort d'une damoiselle, qui se pendit et estrangla pour le grand despit et regret qu'ell'avoit de ce qu'un cordelier avoit usé d'elle comme de sa femme, sans qu'elle pensast estre couchée près autre que son mari : laquelle histoire sera récitée plus au long ci-après, où nous traiterons des paillardises des gens d'église. On oit aussi parler d'aucunes qui se sont desfaictes pour le grand et furieux despit qu'elles avoyent de ce que leurs maris leur avoyent rompu la foy, et qu'elles ne se pouvoyent venger de celles qui en estoyent cause. Et non seulement pour ces occasions, mais aussi pour autres, aucunes ont esté meurdrières d'elles-mesmes en nostre temps. Quant aux hommes, on trouve pareillement que les uns par une occasion, les autres par un' autre ont esté induits et poussez à telle meschanceté. Et à propos de la foy de mariage rompue, je répéteray encores icy ce qui avint en une ville de Suisse il y a environ vint ans, qu'un qui avoit trouvé sa femme en telle faute, et la luy avoit pardonnée, se ravisa quelques jours après, tellement qu'il la tua. Et incontinent après traita de la mesme sorte les enfans qu'il avoit eus d'elle, leur allégant qu'il ne vouloit point avoir des enfans qui fussent appelez enfans de putain. Ce qu'ayant faict, il se précipita d'un lieu haut,

(i) Trois, journée, vingt-trois, nouvelle.