CHAPITRE XVIII

et se rompit le col. Mais on luy trouva en son sein un papier contenant les occasions qui l'avoyent meu à commettre ces meurdres, et pareillement que sçachant bien que pour iceux on le voudroit faire mourir honteusement, il avoit mieux aimé par tel moyen s'oster luy-mesme hors de ce monde. Et sur ceci il me souvient de ce que raconte Pontanus d'un seigneur Italien, qui ayant tué celuy qu'il souspeçonnoit estre adultère de sa femme, fut si estroitement assiégé par le frère d'iceluy, qu'ayant perdu toute espérance d'eschapper, il la tua et ses enfans après ; et puis se précipita de la plus haute tour de son chasteau. J'ay ouy asseurer aussi de celuy de Padoue qui tua ses fillettes ainsi qu'il a esté raconté ci-dessus, qu'il se précipita quelques jours après sur le chemin qu'il avoit pris pour se sauver. Et sur ce propos mesme, à-sçavoir de ceux qui après avoir esté meurdriers de leurs enfans, ont esté meurdriers d'eux-mesmes, je réciteray un'histoire autant tragicque que je pense se pouvoir trouver en aucun livre ni ancien ni moderne. L'acte est tel, avenu en Beausse (selon aucuns) de nostre temps. Un laboureur, qui avoit assez bien de quoy, liant des gerbes aux champs, envoya son fils en la maison pour luy apporter quelque chose. Contre lequel estant retourné il se choléra (pourcequ'il avoit trop demouré à son gré) tellement qu'il luy jetta une motte à la teste, dont il tomba mort à terre. Ce que voyant, il le couvre de gerbes, et s'en va tout désespéré en sa maison, où sa femme estoit se baignant, et baillant à teter à son petit enfant, duquel ell'estoit fraischement accouchée; de là s'en va en sa grange, et se pend. Cela rapporté à la povre femme par quelcun qui y estoit entré bien-tost après, de grand effroy qu'ell'eut, en se jettant hors du bain pour y courir, fit tomber son petit enfant dedans : lequel s'y noya. Tost après, la povre femme, esperdue

du triste spectacle qu'elle venoit de voir, trouvant à son retour ce petit enfant noyé, entra aussi en tel désespoir qu'elle s'en retourna en la grange, et là s'estant enfermée, se pendit auprès de son mari. Tellement qu'en un mesme jour le père tue le fils, n'ayant cuidé en venir jusque là : la mère pareillement noyé son petit enfant, sans y penser : et tous deux par un semblable désespoir se pendent. Mais ce point est à noter, qui rend les meurdres commis par ces père et mère, dissemblables aux autres : à-sçavoir qu'ils ont esté commis, l'un du tout par mesgarde, à-sçavoir celuy de la mère : l'autre selon le proverbe qui dit que tel tue qui ne pense que blesser (i).

Or comme les hommes trouvent plusieurs autres occasions de désespoir, aussi oyons-nous parler de plusieurs personnes qui se sont desfaictes pour autres raisons. Et entr'autres on peut alléguer, un assez bon nombre d'usuriers de nostre temps, qui par un juste jugement de Dieu n'ont attendu autres bourreaux en ce monde. Et généralement sont subjects à ceste tant infâme et tant exécrable mort tous ceux ausquels la conscience fait le procès. Car après que le procès est faict et parfaict là-dedans par une procédure extraordinaire, aussi par une voye extraordinaire est mise en exécution la sentence. Sur quoy il me souvient d'un qui estoit secrétaire d'une ville de Suysse , lequel ayant receu une telle sentence par sa conscience (comme aussi ses meschancetez estoyent assez divulguées), après avoir failli souvent à l'exécuter, en fin l'exécuta alors qu'on l'en pensoit mieux garder. Car ayant esté trouvé une fois es bains se chiquetant (2)

(i) « Tel tue qui ne pense que blesser el tel cuide frapper qui tue. » Cotgrave.

(2) Littré ne donne pas d'exemple de ce verbe, qui vient de chiquet, diminutif du latin ctccum, petit morceau.