CHAPITRE XIX

De la cruauté de nostre siècle.

OMBIEN que les homicides desquels j'ay faict mention, ne soyent point exemts de cruauté, mais au contraire en aucuns d'iceux s'y en trouve une très- grande, j'ay délibéré toutesfois d'alléguer à part des exemples d'icelle, non pas tous ceux de nostre temps que j'ay en main, mais aucuns seulement qui contiennent quelque faict extraordinaire et non vulgaire. Desquels encore que nos dernières guerres civiles me puissent fournir grand nombre, je ne veux toutesfois m'adresser là, de peur de renouveler les playes de plusieurs es mains desquels ce récit pourroit tomber. Aussi ne parleray-je point des cruautez exercées à Merindol et à Cabrière, pour l'horreur desquelles, estans récitées devant la cour de Parlement de Paris, tant par l'advocat Auberi, qu'autres, plusieurs auditeurs estoyent contrains de boucher leurs oreilles. Ce seul point peut estre un suffisant tesmoignage de l'énormité de ces cruautez : c'est que Jehan Menier, seigneur d'Oppède, chef de ceste entreprise, comme estant premier président du parlement de Provence, et gouverneur et lieutenant général du Roy au pays de Provence en labsence du seigneur de Grignan, ne pouvoit trouver des soldats assez cruels à son gré, combien qu'il eust choisi ceux