CHAPITRE XXX

Comment nostre Sainct-Pêre envoya son légat l'évesque d'Arras à Paris pour le voyage de Turquie.

Les fais du monde sont mervilleux. Les ungs rendent fruict et espoir et les aultres désolacion ; icy édiffient et là démolissent ; les ungs renoent à .ung bout, à l'aultre par ung contraire ils deffont et désemparent.

Exemple ycy à Rains là où légierté et commotion du peuple, sans adviset par faulte de provision prinse à temps, a esté commenchement d'ung grand esclandre en ce royalme, et cause de mort à pluiseurs povres créatures qui perdues se sont, ne scevent comment, sinon que povreté de sens et faulte de bon advis, les a menés à confuse fin. Mais comme icy l'on povoit avoir matière maintenant de desplaisir, au couronnement d’ung nouvel roy qui se povoit traire aussi en Paris, leroy séjournant là aveucques son bel oncle, matière vint à l’aultre lez de grand consolation et de félicité, quand nostre sainct père le pape envoya là, par manière et en puissanche de légat, l'évesque d'Arras pour la réintégration de l'église de Dieu moult foible et basse, ensemble pour le faict du voyage sur les infidèles, les ennemis de Dieu, dont il avoit tant presché et faict solliciter aulcunes fois le roy Charles son père défunct. Et sachant ledict nostre sainct père ledict roy Charles jà estre trespassé, et son fils Loys de présent estre en sa succession de la couronne, prestemen’ envoya vers lui et devers le duc de Bourgongne, pour solliciter ledict voyage ensemble et pour restorer à l'église ce que si longuement lui avoit detenu son père par puissance, la pragmatique sanction. En quoy ledict roy présent certes s'employa bien et léallement depuis, et la mist hors de ses mains, comme chy après se dira en son lieu. Et rechupt le roy moult revéramment ledict évesque ayant puissance de légat par tous les royalmes de Franche, d'Angleterre, d'Escoche , et les terres et seignories du due de Bourgongne et tous les prinches de Franche ; pareillement de par le duc de Bourgongne. Et en ces meismes jours vindrent à Paris aussi ceulx de Thionville, en toutte humilité et révérence, eulx rendre à la merchy du duc de Bourgongne et lui priant merchy de leur longue rebellion et deforaines voyes que avoient tenus; et lui apportèrent les cfefs, lui promettant vraye et enthière obéissanche, comme à leur signeur, tel qu'il se vouldroit nommer. Car eux voyans et considérans la mort du roy qui estoit le nourrisseur de leur querelle et sur quise fondoient, et que maintenant n'avoient nul recours ne confort à aui, congneurent bien que l'estrif contre le

due de Bourgongne leur estoit importable et impossible à maintenir , quiconque les vouldroit encore aydier et soustenir, se ne feust le roy de Franche seul. Dont ils sçavoient bien maintenant et entendoient que cestui chy qui de présent l’estoit ne feroit jamais sa cause. Et partant pensèrent à prévenir l'indignation de ce duc, comme sages ; etse vindrent en sa merchy. Lequel leur promist de venir visitter son pays de Luxembour

au partir de là, pour recepvoir de nouvsl les obéissanches et hommages des rebelles et pour mectre tout en bon ploy, comme il fist et comme vous orez quand il sera lieu.