LA6A

tetles et samblables choses vaines de nul fruict, je pourroye estre notté de faveur, comme voellant par trop grandir les choses de ce duc, je m'en tais et passe oultre ; et, le remanant, je le laisse en la récordation es parlans , en quoy les dammes parisiennes vauldront bien ung tesmoignage, voire celles de ce temps. Envers ce temps chy et ung peu devant que ces joustes se feissent, arriva à Paris le seigneur de Créquy devers le duc son maistre, retournant devers le roy d'Arragon, frère au roy Alphonse mort, auquel, à l'instance meismes et grand requeste dudict roy, il avoit porté, aveucques Thoison d'or, par la délibérâtion du plein chappitre des frères, le collier de l’ordre de la thoison , et lequel ledict roy rechupt en grand honneur et en grand embellissement de sa fortune, soy réputant 'eureux d'estre esleu frère d'une si haulte et noble compaignie , la plus exquise de la terre. Dont ledict de Créquy, aveucques Thoison d'or, fist le record notablement à son maistre , aveucques mille recommendations dudict roy à ly, ensemble tous les grands offremens qui faire se povoient ne dire de grand prinche à aultre, là où on désireroit alliance et amour. Dont sitost après quand Thoison d'or estoit retourné d'Arragon, prestement fut renvoyé en Gheldres , pour porter au josne duc de Gheldres, retourné nouvellemént du Sainct-Sépulchre , le collier aussi de l’ordre , ensemble le manteau et les aultres estoffemens qui y appartiengnent. Et par ainsi furent employés les six coliers donnés en la feste tenue à Sainct- Omer, en la saison devant, par l'ordonnance du chapittre.