CHAPITRE XLVII

Gomment le duc rechupt les Anglois très haultement en la ville de Valenchiennes et des dons qu’il leur fist.

Moult furent joyeux et firent grand feste les Anglois de la bonne réception que leur fist le duc de Bourgoingne en sa ville de Valenchiennes, là où tous les jours furent vis tés de grans barons de l'hostel du duc et des sens du conseil. Dont , sur la fin de leur despesche, le duc meismesles veull festyer. Et de faict fit appointier le bancquet moult riche, et les deux chevaliers fist seoir à sa table, lung à sa dextre , l'aultre à sa sénestre , mais aveucques pluiseurs aultres grans prinches et barons que tous y séirent, et ly au milieu; et là où la chière fut faicte telle et si joyeuse à leur cause qu'onques, par leur proppre confession, ne se trouvèrent si haultement festoyés ; et tellement que, quand se trouvoient à part, devisans de ce prince, ne povoient saouler leur affection d'en parler et d'en dire les biens qu'ontques n'avoient veu en aultre personne , plaignans , par manière de parler, que sitost povoit estre mortel, et que le monde estoit estoré d'ung semblable qui tenist régnation sur tout. Si ne diray-je plus de leur despesche, pour cause que ailleurs

qu'ychy et en aultre ambassade plus grande sera ceste matière relevée. Mais le duc, après touttes honneurs et bonnes chières faictes, et les avoir deffrayé de touttes choses, encoires leur envoya à l'hostel vaissel d'argent en prix de cent marcs ou environ, par portion à départir à chascun selon son estat. Dont encoire plus entreprins que devant de vergon- : gne, ne sceurent comment assez eulx acquitter pour grâces et loenges Îy rendre. Si advint que, ce propre soir, le duc meismes party de sa ville pour aller vers Luxembourg. Dont les ambassadeurs le voellant remerchier de nouvel, nonobstant que le congié estoit pris, montèrent à cheval et le convoyèrent ; et là luy rendirent grâces de ses dons, qui à peu de mots leur en rompy le parler ; et fuyoit le remerchiement de sy peu de chose.Et à tant partirent de ly et retournèrent à Valenchiennes, là où le duc arrière leur avoit faict appointier leurs bains pour eulx et pour quiconques avoient de famille; voir bains de tout ce qu'il fault au mestier de Vénus, à prendre par choix et par élection ce que on désiroit mieulx , et tout aux fraix du duc. Dont l'yssue, pour ce qu'elle estoit en compaignon cten commune, leur fist dire cent mille biens de la maison et de la manière de faire. Et à tant partirent de Valenchiennes et s'en retournèrent à Calaix , et de là en Angleterre, où je délaisse jusques à l’aultre retour qu'ils firent vers le duc pour besongnier plus avant.