CHAPITRE XXXVII
/ Comment le séneschal s’en retourna devers le roy et du recueil qui lui fut faict.
Le séneschal le lendemain fut festié de messire Adolf de Clèves, et grandement tenu ayse; dont l'après disner il prit congié du duc et s'en alla devers le roy à Eulx, là où il fut haultement receu et bien veignié ; et lui fit le roy chière et honneurs les plus grands du monde, et trop plus que homme n'’eust osé penser, pour cause que tant l'avoit hay aultresfois , et tenu longuement en prison, en dangier de son corps. Mès le roy ayant sceu et oy les haultes chevaleries et grans faits que montrés avoit en Angleterre et Escoce avecques la reine angloise , et qu'en renommée d'ung des meilleurs chevaliers qui oncques fust, il estoit retourné par dechà , et avoit fait honneur au royaulme françois et à luy propre, qui là l'avoit envoyé quasi comme pour perdre, comme Jason en Colcos; non saichant comment le retribuer condignement de son service , ne savoit à peine mettre fin en luy faire honneur , et en le conjoyr et festoier de tout son povoir , disant : que de biens lui feroit tant, que le monde percevroit publiquement qu'il lui portoit amour. Si me dict tantost après le ginéral de Normandie, messire Jean Arnolfin qui estoit présent à ces paroles, que se le roy tenoit sa promesse audict séneschal et lui faisoit la dixiesme part des biens qu'il lui promist, il le feroit ung des haults hommes de France en faict d'auctorité, quoique , sans icelle , en vertu et en cler tiltre, toujours l’avoit-il esté et l'estoit-1 auparavant. Le séneschal se tint à moult joyeux de ceste bonne réception, quoique gaires ne faisoit d'estime des promesses à luy faictes, parce que tant foncié-
xs
ment cognoissoit le roy et ses dicts , de longs ans, et n'avoit guaires grand faim d'avoir auctorité emprès ly pour cause de ses meurs, non semblables au père desfunct. Car meismes m'avoit dict et confessé, n’avoit que huit jours par avant, que si le roy luy donnoit cent mille francs par an, à toutes les meurs et condicions qu'il avoit , si ne le vouldroit-il servir ; et y assigna plusieurs raisons , les quelles pour honnesteté veuil taire jusques aultre plus grand cause me pourra constraindre peult estre que j'y rechéysse. Or voult prendre congié le séneschal et aller voir sa femme à Manuy, la quelle n’avoit veue d'ung an ; et avoit beaucoup souffert de dangiers tandis ; pour quoy plus en avoit aigre faim. Si s'en ünt le roy à content. Dont au partir, le séneschal qui scavoit que le roy alloit devers son bel oncle, luy dict que, s’il lui plaisoit, prestement après avoir faict un tour en sa maison, il revendroit devers ly pour l’accompagnier. Mès le roy ne le voult; ains luy dist qu'il se tenist en sa maison jusques à son retour de là; et lors le manderoit. Et supposoient aulcuns lors, que le rov luy deffendit son retour à cautelle pour deux causes : l'une si estoit, pour ce qu'il estoit aventé jà comment il se mesloit de l'accord faire entre le père et le fils, dont il meismes desireit avoir honneur devant tous, ou par aventure aimoit mieulx que le discord y fust que la paix , pour en temps avenir mieulx venir à ses fins de la maison , la quelle par demorer unie estoit trop roide et trop forte, non bien à son gré. L'aultre cause que l'on pooit ymaginer aussi, estoit, pour ce qu'il ne voloit point qu'il presist longue hantise en celle, souverainement du duc, de peur que le cuer ne ly tirast trop là envers, car le sentoit fort y estre afecté par singulier loenge.
