CHAPITRE XLVI

Comment multitude des seigneurs convinrent devers les Anglois pour les mener au lieu du festoy, et comment le duc les mena devant le roy.

Par ung lundi matin doncques, environ dix heures , après messe oye, convindrent multitude de seigneurs devers les Anglois pour les mener au lieu du festoy, comme : le seigneur de Cimay, son fils messire Philippe, le seigneur de Lannoy, messire Philippe Pat, le seigneur de Rabodengues , messire Pierre de Miraumont, et grand nombre d'aultres ; les quels tous ensemble se mirent en voie et entrerent au parc par une poterne au dehors de la ville, pour ce que le duc ne voloit point les faire passer par le chasteau jusques au retour, en quoy gisoit mystere. Si passèrent Anglois parmy ce parc, joyeusement devisans avecques les conduiseurs, et disans, par pluisieurs causes : qu'oncques n’en avoient veu nul si bel ne de si haulte forest, ne là où tant eust de deduict de dains et de cerfs et d'aultre bestail. Dont quand vindrent aux fontaines et là où là telle rivière couloit parmi, le loèrent encore plus et plus s'y delitèrent. Là trouvoient tables mises et dressoirs chargiés de vasselles , cuisines estorées de tous biens, et caves furnies de vins, avecques les offices et serviteurs duisans à toute, comme pour en riens faire faulte. Le seigneur de Croy prestement y survint, sans que point on le y attendoit. Si fit le patriarche d'Aquilée, que le roy y envoyoit aussi de par ly ; ensemble les généraux et les tresoriers de France avec aulcuns du grand conseil du roy. Et ce faisoit le roy en faveur de son bel oncle, pour tant mieulx honourer et conjoyr l'ambassade, qui moult le receupt à grand honneur. Et entendoit bien que plus se faisoit ce en l'honneur et pour l'amour du duc que pour eulx. Le seigneur de Croy à son survenir excusa fort son maistre, disant : que moult et durement lui desplaisoit que estre ne povoit avecques eulx pour leur faire chière.

Car quoi .que le corps n'y estoit point, si y estoit le cuer et l'affection pour y voloir estrez Mès pour non donner senestre ymaginacion au roy, par trop leur estre favorable en sam-

blant, convenoit ung peu dissimuler de son bon voloir , et ouvrer par fainte. Et pour ceste cause, disoit le seigneur de Croy, l'envoyoit-il devers eux pour tenir son lieu.

Lors furent faites les assiettes à tous lez, viandes portées , les vins versés; et toute multiplicité des biens de la terre dont on peut faire festoy ne estre acquis pour argent, fut la monstrée, à telle comblesse que souhait se fut contenté de la mesure; et n'y restoit rien , de faulte, fors qu'iln’y avoit autant de bouches pour mangier comme il y avoit des doigts ès mains des mangeurs. Tout le service du dressoir se fit en vasselle dorée, et estoit la chière à tous lez grande. Le disner faict et les espices données, on remonta à cheval ; et fut le retour ordonné par lieu de deduit. Et passant par la forest en diverses devises, finablement on approcha le chasteau, là où estoit le roy dedens et le duc qii les attendoient. Le roy estoit dedens sa chambre avecques les siens; et le duc estoit dedens la sienne avecques les siens aussi, là où gaires ou riens n'avoit entre deux. Le duc avoit ordonné qu'on les menast devers ly tout droit au descendre; et le roy avoit esté adverti du duc, comment prestement eulx venus devers ly en sa chambre, illes menroit en la sienne et les présenteroit; et en estoit le roy mout bien content. Si montèrent les Anglois, une grand part , jusques en la chambre du duc, là où lui rendirent grâces de ses biens receus et du festoy. Mès le duc, non vueillant tenir paroles sur si petit faict, en rompit le langage et leur dist: que séante chose estoit et appertenante, que eulx estans là venus, si près du roy que jusques à n'avoir que ung huis entre deux, quils le veissent et le saluassent. Car, posé que n'eussent riens à faire à ly, ne quelconque charge, et que leurs deux natures estoient enmeslées et en énemisté , toutesfois si ne pooit honneur souffrir qu'ils ne se missent en devoir pour le saluer , et luy faire l'honneur tel comme à un roy meismes. Le roy Eduard à leur retour, s'ils avoient faict du contraire, les en devroit reprendre et en seroit mal content. Si crurent AngJois , et dirent que volentiers feraient ce qu'il leur ordonneroit et conseilleroit, car avoient le commandement tel. Lors les mena

CHRONIQUE DES DUCS DE BOURGOGNE.— 1I° PART

le duc devers le roy, qui tout en estoit avisé. Et tenant l'évesque par la main, se rua à genoulx devant le roy, disant : « Monseigneur, vecy les gens du roy d'Angleterre venus à mon instance et prière en ma ville de Sainct-Omer, pour bien de paix et de trèves entre vostre royaulme de France et cely d'Angleterre, et au quel lieu de vostre grace il vous a plu envoier aussi vos ambassadeurs, à mon instance pareïllement , pour convenir ensemble sur la dicte matère, comme ils ont faict et y ont longuement vacqué. Dont pour ce qu'ils vous sçavent en ceste ville, posé que n'aient aulcune charge vers vous, vous viengnent faire la revérence.— Beaulx oncle, ce dict le roy, Nils soient les biens venus. J'ay bien à cuer leur venir par dechà et la matère en quoy ils ont laboré avec instance. Et moy j'y ai trés volentiers entendu, et encore veulx entendre, à vostre contemplacion; car je veuil bien qu'on saiche par tous siècles que, cecy et aultres choses plus grandes je suis bien tenu à faire pour vous , car de vos mains je tiens mon royaulme et ma coronne, et ce qui plus m'est beaucop car j'en tiens ma vie. Si que, soit de ceste matère , soit d'aultre chose de ce que vous ordonnerez, ne dire voldrez ne çommander, je veul que soit faict et accompli; car ne doy, ni ne veul, ne ne voldroie, ne polroie vous contredire, tant feust grande la chose. Dont etse mes gens n'ont eu puissance assez ample pour besoigner au parfait de vostre desir, vez moy ici qui me par offre en ma personne en faire tant et si avant que vous voldrez ne sçavez aviser convenable ne expédient à estre faict. Car si j'avois dix royaulmes, qui en ay plus de Dieu que je ne vaulx, si les vouldroie mettre et soumettre à vostre bonne disposicion, et ordonner , comme qui plus haut ne plus sainement ne poroie ailleurs en ce monde. » Sur ces mots le duc respondi et dist : « Monseigneur, cely honneur m'est trop grand ; et ne suis digne d'en avoir la centiesme part. Je ne fis oncques riens pour vous qui soit digne de compte; mès ce que j'ay faict, je l'ay faict de bon cuer, selon mon pooir, mès non à vostre appertenir. Et ay faict ce que je doy envers vous, et tout à fin de bien. » Le roy respondit

arrière : « Beaux oncle, vous m'estes et avez esté père, et plus que père, et le sauvement de mon royaulme et de moy. Si ne souffre Dieu que jamès j'en descongnoisse le bien receu ! » Et à tant prist la parole aux Anglois, et les remercia de leur visitacion, et les principaulx toucha en la main. L'évesque anglois fit une petite proposicion devant 1y,.en latin, mpourveuément ; et la fit belle et notable, d'autant quelle contenoit; mès peu dura. Et dict bien que point n'y estoit pourveu , pour Cause que nulle quelconque charge n'avoient de leur roy de venir vers ly; et pourtant requist humblement d'avoir acceptable ce que si en subit pooit dire devant sa magesté. Si le prist moult en gré le roy; et loa son parler; et après vint en devises avecques eulx sur le roy Eduard, leur demandant comment il luy estoit; et les interrogua de pluiseurs choses ; après les quelles dict tout haut: qu'il voloit du bien beaucop au dict leur roy, nonobstant qu'ennemy feust à son cousin germain le roy Henry. Mès il estvit ung gentil prince, ce disoit, et qui beaucop estoit tenu à Dieu d'estre venu là. Disoit en outre : que au temps quand ne soloit estre si grand maistre comme maintenant estoit devenu, chascun soloit bien congnoistre son compaisnon. Mès maintenant la fortune de Eduard estoit changée ; si ne sçavoit point se maintenant le vouldroit reconynoistre. Toutesvoies en effet il estoit à son commandement, ce dist, et à son plaisir faire là où il polroit.