CHAPITRE IV

Comment l’auteur, pour la variation du roy, il prévoit advenir meschief au royaume

Or n'est point sans cause que j'ay ramené à conte ce Philippe de Savoye, prisonnier, et les murmures qui s'en faisvient ; car de ce costé de là, tout en ceste meisme saison , ce sambloit ung disposement de rumeur en ce rovaulme comme d’aultre part ailleurs, et là où les causes estoient jà nées et en estre les aulcunes, ct les aultres prochaines d'avenir et qui avindrent non pourpensées. Et ce dis-je pour ce qu'à l'heure de cest escrit et que je manioie ceste hystoire, je me doutoie pour le temps prochain de tribulation , et que par les circonstances des diverses causes qui touttes pooient torner en ung effect, il estoit mal apparant d'en pooir évader au long sans ruyne; car le roy, ce que dur m'est que ainsy le me fault escrire, prist à tous lez questions et querelles aux princes ses parens ; usa de volouté et de propre teste en tous ses faits ; avoit povre effect en son promettre , et amour variable en belle parole ; ses amis et voisins puissans traitoit en rigueur ; quéroit à les rongnier en leur puissance ; estudioit à se faire craindre, non à amer ; meismes de ses propres subgects et serviteurs n'avoit grace, et le savoit bien ; réveloit son corage publiquement de la haine que portoit en

cuer; et de ceux dont se pensoit servir seloncq sa nature , et fuissent encore de petit los, ceux accueilloit-il; voloit seul régner et estre crému de tous; norrissoit sédicions et les pratiquoit 1y meisme : en Castille contre le roy Diépo, qui en chéy en dure guerre à l'encontre de ses nobles ; et, comme se dira ci-après, en Bourgoingne du père encontre le fils, dont tant de doleurs et de meschiefs se disposoient pour avenir, que nulle pitié pareille ; en Angleterre du roy Edouard à l'encontre son propre cousin-germain le roy Henry et sa cousine-germaine la royne; en Liège, là où il estoit fausteur des Liégeois, sousteneur de leur orgueil contre leur évesque et contre le duc de Bourgoingne; et en Bretagne , pour ce que le duc et le comte de Charolois s’entre-amoient ensamble , à l’ung préparoit guerre toute conclute par ses gens d'armes, et à l’aultre quist les voies pour la y avoir en temps à venir ; et ne s'en faignoit en paroles. Par quoy je dis, tout mis et tout pris ensamble, considérée ceste manière de faire qui est estrange , considérées les personnes auxquelles il se prenoit et tout en uns ensamble , considéré aussi que tout ce qui estoit de l'appertenance du duc de Bourgoingne et d'alliance, tout ce il repulsoit ct traitoit dur, et en quoy il donna trop à cong noistre son corage pour avoir los, certes je dis que petit espoir me pooit estre alors de paix ne de bien en ce royaulme longuement durables , ains peur grande et véritable conjecture de meschief, quand les causes y estoient touttes clères. Dont il peut estre que cy après vous trouverez plus et plus encore grandes apparences de ceste tribulacion doutée ; par quoi, s’elle s'y treuve enfin, et que ma peine tourne à effect, au moins S'y trouveront les causes alors descouvertes par moi de production longue.