CHAPITRE LXXIIL
Comment le comte de Charolois se submist au noble plesir de son père le duc.
En cestes belles et aimables parolles du père , le fils se tint à reconforté assez; et remercioit humblement son père, disant aveucques ce et lui promettant que jamès ne seroit que vrai obéissant fils, tout prompt et tout humble à le servir et craindre, comme fils doit faire père, et qu'oncques en son vivant n'avoit esté en aultre propos, quelque semblant qu'il y eust eu de discorde par avant pour cause du seigneur de Croy, duquel, mès qu'il lui pleust à entendre et congnoistre l'action et juste querelle qu'il avoit contre ly, ce lui estoit assoufisement de tous biens, et ne lui requerroit aultre chose , lui disant bien et monstrant en ces propres termes :
« Monseigneur, le cas ne touce point à moi tant seulement pour le présent temps ne qui est à venir, mès il touce à vostre propre personne , à vostre haulteur"“et seigneurie, et à la ruine de vostre maison, et tout en mon despit. Et moy, vostre fils, monseigneur, successeur de vostre grasce, de vos pays et seigneuries , et vostre seul héritier , quand je l'ai receu et atteint par vive preuve, et que les expériences en sont toutes clères et trouvées. n’y dois-je pourveoir et remédier si je
me +=
sçavoie ? ne m'y dois-je mettre au-devant et aller à l'encontre, et garder que, non moi tant seulement , mès que vous ne soyez pincié ne mocquié, ne diminué en vos pays et seigneuries, et, par ceulx que vous cuidiez et espérez estre preud hommes et léaulx serviteurs envers vous, mené à confusion et à honte et à perte irréparable? Monseigneur , les exemples vous y sont beaux, s’il vous
plest à les entendre , car les esparques (1) en
volent devant vos yeulx; mès avant que l'an passe, vous les congnoistrez plus à plein et plus encore à grand amiracion que de présent, Si vous supplie humblement que du tout en tout il vous plaise m'avoir et tenir en yostre grasce et dilection ; et de toute ma cause et querelle , où que je l'aie ne à qui, je m'en submès et ordonne en vostre noble plaisir et vostre seul bon avis; et ordonner j'en veulx ; et vouldray faire et lessier, en observation de mon honneur. »
Atont partirent dehors de l'oratoire père et fils, nulluy emprès eux que le clerc de chapelle Caron, messire Adolf de Clesve et le seigneur de la Roche, aveucques pluiseurs aultres barons qui les attendoient là devant à vuidier; et perceut-on bonne chière au visage du comte qui s'estoit désenflé de sa douleur, et avoit trouvé le père bien disposé envers ly,et de quoy il fit feste à tout homme.
