CHAPITRE CIV
Comment ung Gantois s’avança a monter auprès du duc advocassant pour ses compagnons.
Or, tandis doncques que ces paroles se disoient en bas contre mont, et que le duc y entendoit de grand cuer, avint que ung grand rude villain oultrageux et fier estoit monté à mont céléement , et s’estoit venu mettre à la fenestre emprès le duc; et là venu haussa sa main , qui estoit armée d'ung gantelet de noir fer vernissié , et férit ung grand coup sur le bas de la fenestre pour se faire oïr ; et sans porter révérence au prince ne cremeur, se présuma à dire ainsi: « Vous, mes frères là en bas, qui quérez à faire vos plaintes et doléances à nostre prince ici présent d’aulcunes grandes causes qui nous cempèêtent, et premièrement de ceulx qui ont le gouvernement de ceste ville ici, qui desrobent le prince et vous, vous les volez avoir punis! Ne faites pas ? — Ouil, ce dirent les autres. — Et si volez avoir mises jus les cueïlloites ? N'est-ce pas ce que vous querrez? — Ouil! ouil! — Et si volez avoir vos portes condampnées réouvertes et vos bannières auctorisées, comme de tout temps ancien? — Ouil ! ouil! — Et si volez et priez de ravoir vos chastellenies, vos blans chapperons , et vos anciennes manières de faire : Ne faites pas ? — Ouil! ouil! ce respondirent. »
Et alors le vilain, à ce mot, tourna sa pa rolle devers le duc, à la fenestre, disant:
« Monseigneur, c'est ici en brief pourquoi ce gens là bas sont icy assemblés pour vous faire requeste, et aflin que vous y pourvoiez. Et moi, en nom de eulx tous, je le vous declaire, et ils m'en aveuent, vous l'avez oy. Siques, pardohnez-moi, je le vous ai dit pour eulx et pour ung mieulx. »
O glorieuse majesté de Dieu, et que vécy une oultrageuse et intolérable vilenie commise en la face d'ung prince , et d’ung tont vil
bas homme, que de soi venir mettre et joindre emprès les flancs d'ung tel prince son seigneur, encore et proférer paroles contraires à sa haulteur par contempnement de sa seignturie, et de quoy le plus povre noble homme du monde, par la manière du faire eust pu avoir le cuer crevé d'annuy et de despit de le tollérer et porter. Et si convint toutes-fois que ce noble prince le portast et tollérast pour ung mieulx à ceste heure, et qui le coulast par une risée , qui en devoit morir de dueil. Et alors le scigneur de Gruthuse, qui bien en sçavoit dissimuler son despit, en pareil comme son maistre , qui ensamble s'entre-regardvient piteusement, dist à ce vilain doucement : « Mon ami, ne faisoit besoing que pour ceste affaire montassiez ça hault, qui est le lieu du prince, et député pour ly et pour ses nobles : de là bas vous eust-on bien oy; et vous eust monseigneur respondu ainsi qu'en chà; et sans vous avoir à avocat, il contentera bien son peuple. Vous es:es ung estrange maistre ; descendez, descendez en bas, et vous en allez avecques vos gens : monseigneur fera bien du tout. »
Si s’en alla le vilain et fut convoié en bas et s'en alla; ne sçay qu'il devint. Et le duc et tous les seigneurs demorèrent tous esbahis de l'outrage du vilain et de son orgueilleux emprendre. Et le duc, au plus bel qu'il pooit , et après avoir contenté le peuple par paroles’, monta à cheval, et s'en repaira en sa maison, là où apriesmes monstra la destresse de son corrage à sa famille , laquelle il fist tout armer et veiller ceste nuit en sa maison, de peur d'inconvénient; ne oncques puis n'ot heure de joie dans la ville, jusqu'à tant qu'il s'en trouva dehors.
