CHAPITRE XLII

De la reception que le roy françois fit au roy anglois.

Le roy Charles estoit assis en dos couvert de fleur de lis. Rembellissoit son thronne doré toute la salle plaine merveilleusement des seigneurs; et le roy anglois, mettant son piet en l'huys où estoit assis le roy tout au bout de la salle, osta son chappeau, et marchant diligemment oultre pour venir jusques au dos, sans que le roy Charles se levast oncques, assez vint près de luy ; et lors le roy Charles se levant se peu non, le roy Henry coulla le genoul assez bas et luy fit honneur , disant

assez humbles et gracieuses parolles pour ennemy et roy tel qu'il estoit ; et le roy françois faisant peu d'estime et peu de langaige, luy respondy joyeusement : «Or çà, vous! soyez le très bien venu, puisque ainsy est! Saluez les dames. » Et à ce mot se rassist. Et sembloit avoir sens plus mille fois que on y espéroit, car sa maladie régnoit lors. Et sembloit que Dieu, pour celle briève espace, ouvrast en luy et ]ny donnast sens et vertu de sçavoir faire ou laisser ; car oncques conseil d'homme ne le peult faire lever, jusques à le veoir près de luy, non plus que encontre ung de ses vassaulx , prince de son sang.