CHAPITRE XLI
De l’arrivée du roy anglois à Troyes auprès du roy de France , et de la compaignie que lui fit le duc de Bourgoingne.
Le roy Charles continuoit tous-jours:' sa résidence à Troyes sur l'attente du jour de la convencion du roy anglois et de luy present, qui encoires n'estoit venu, mais fort aprochoit. Si en convient faire narracion telle que le cas le requiert, et parler de la venue du roy anglois vers le roy Charles, qui plus y vint par orgueil que par amour, et plus à la confusion de la magesté françoise que à son bien , sinon en tant qu'il touchoit seullement à son prouffit. Et combien certes que le duc bourgoingnon fut beaucop cause d'avancement en ceste matière , comme il quéroit bien et vouloit que l'en le sceust, toutesvoies, ne fust esté pour venir à la vengance de doloreuse injure receue , pour l'or du monde avoir eu entièrement, si ne s'y fust trouvé ne accordé, car n'avoit cause de bien vouloir aux Anglois, ne nature ne s'y povoit traire , sinon par fiction constraincte, procédant de couraige enfelly de yre et replet de sang vindicatif, comme depuis il a montré par fait et par effect evidamment assez, là où sa vertu s’est résolue en sa nature telle qu'elle devoit estre. Le roy anglois doncques, acompaingnié de ses deux frères, les ducs de Clarence et de Glocestre, et des comtes de Hantindon et de Quint avec piuiseurs autres grands seigneurs , partit de kouen, environ à seize cents combattans, la plus part archiers. Si vint à Pontoise, passa par
auquel lieu il laissa de ses gens aucun nombre pour garder le passaige. Delà s'en vint à Provins; et y coucha celle nuyt ; et le lendemain print son chemin vers Troyes en fier et orgueilleux contenemenit sur les champs, le plus que l'en pourroit dire, combien que la terre sur quoy il marchoit ne luy estoit pas amye; et si failloit-il toutesfois que elle luv souffrist le passaige sans saulf-conduit , dont force non équité fut cause de la violacion.
Le duc de Bourpoingne , sentant sa venue assez de près, se mist ès champs noblement accompaignié, et là, pour l'honneur de réaulté, et de l'aliance aussi qui devoit estre entre eulx des deux seurs, s’en alla au devant de luy assez avant. Et venu près dudict roy Henry, lui fist compétent honneur et le salua à cheval assez révéramment , ne trop ne peu; et le roy anglois arrière luy, par semblable cérimonye qui y apartenoit à faire, chascun soy contenant en ses termes joyeusement de sa haultesse et s’entrefirent grand chière.
Aussi firent les seigneurs tous les ungs aux autres; et vindrent tousjours devisant ensemble, par espécial le roy et le jeusne duc jusques au descendre au logis là où le duc Bourgoingnon le convoya; mais descendu , n'arresta gaires qu'il ne s’en alla à toute sa grand seignourie amenée devers le roy, où le duc bourgoingnon jà estoit rallé luy signifier sa venue , et pour s0y donner parement et compaingnye à son seigneur chief, et splendeur de sa maison là où il debvoit foy et honneur.
