CHAPITRE XXII

Comment les ambassadeurs du roy revindrent devere le duc, et du siége que le duc meit devant la ville de Gand; et comment les Gantois envoyèrent prier audict duc d'avoir saulf-conduict de venir vers luy.

Le duc estant à Hoyguemustre, au pays de Wast, les ambassadeurs du roy, quy estoient retournés à Gand, vindrent vers luy, et luy contèrent la response des Gantois ; et luy dirent comment ilsrapportoient le saulf-conduict qu’il avoit envoyé pour aulcuns Gantois, et que ceulx de Gand n’en avoient tenu compte. Lors jura le duc que jamais à eulx paix ne feroit, s'ils ne se mectoient à sa vollonté; et se ils ne se y mectent, se les y mectra-il par force. Et prestement la response oye par les ambassa deurs, ils se partirent de Hoyguemustre. Luy s’en alla à Axelles ; et illecq, après ce qu’il olt conquesté tout le pays de Wast, et mis en obéissance en moins de quinze jours, assembla touts ses gents, et alla mectre le siège devant Gand; et se logea le duc à Long-Pont, assez près de Gand. Et tantost que ceulx de Gand perceurent les gents du duc et luy propre, sy envoyèrent prier aulx ambassadeurs du roy qu’ils voulsissent tant faire vers le duc, qu’il leur voulsist renvoyer leur saulf-conduict pour venir traictier de paix. Lesquels ambassadeurs feirent tant que leur requeste feut accordée du duc. Et pour l'honneur du roy, icelluy duc feit bailler son saulf-conduict pour venir,sy bon leur sembloit, parler à son conseil ; mais bien leur feit dire que jà traictié à eulx ne feroit, s'ils ne mectoient leurs corps et la ville à sa vollonté.