CHAPITRE XXXIX
Comment se feit assemblée, à Seclin, pour cuider traictier la paix des Gantois, et comment Pierre Moreau mena par deulx fois les Gantois à Terremonde, et de l’assault qu'ils ÿ feirent.
Derechief encoires les Gantois envoyèrent prier au conseil du duc de Bourgoingne qu’il leur plust tant faire devers le duc qu’il leur volsist envoyer ung saulf-conduict, jusques au nombre de vingt personnes, pour venir traicter de paix , et leur assigner lieu où il plairoit audict duc qu’ils vinsissent. Le due, à la prière et requeste de son conseil, leur envoya ung saulfconduict, et ordonna qu’ils vinssent parlamenter à Seclin, ung gros villaige à deulx lieues près de Lille, et neuf ou environ d’Arras. Auquel lieu de Seclin le duc y envoya pour parlamenter à eulx le comte d’Estampes et maistre Nicolas Raullin , son chancelier, et aultres : et du costel des Gantois vindrent le prieur de Saint- Pierre-lez-Gand, et aultres, desquels je ne scay les noms. Lesquels touts assemblés ensemble ne feirent riens; et s’en retourna chascune partie sans riens faire. Et après ce que les Gantois quy avoient esté parlamenter à Seclin feurent retournés à Gand, ung homme d’armes francois, nommé Pierre Moreau, de l’age de vingt-trois ou vingt-quatre ans, lequel s’estoit allé boutter dedans Gand pour gagner solde, et duquel les Gantois avoient faict ung de leurs capitaines, pour tant qu'ils n’avoient nuls ou peu de
(1) Luxeuil en Franche-Comté, |
[1453] gentilhommes , tar touts les gentilhommes estoient du costel du duc, icelluy Moreau assembla grande quantité de Gantois , et issit hors la ville de Gand , et alla jusques à Terremonde. Mais sitost que le bastard de Bourgoingne sceut leur venue, sy vuida contre eulx; et en occit plusieurs, et les reboutta valliamment ; et s’en retournèrent à Gand. Mais aulcuns jours après, ledict Pierre Moreau rasseinbla les Gantois en grand nombre, et le quatorziesme jour d’apvril mille quatre cents cinquante-trois, vuida de la ville de Gand à touts ses gents; et vindrent devant la ville de Terremonde , en belle ordonnance, et assaillirent ladicte ville. En laquelle ville n’estoit pour lors le dessusdict bastard, ains estoit allé devers le duc ; et y avoit laissé messire François l'Arragonois, valliant et hardy chevallier quy deffendit bien la ville. Et jà -soit que les Gantois y feissent très fort assault, sy n’y gagnèrent-ils riens , ains perdirent noeuî de leurs gents, sans plusieurs quy y feurent navrés. Quand Pierre Moreau perceut qu'illecq ne pooit rien proufliter, luy et ses gents s'en retournèrent à Gand.
