CHAPITRE XLVIIL

Comment le duc retourna à Courtray, et comment le peuple estoit travaillié pour avoir et lever argent.

Après ce que Poucres feut desmolie, le duc se retourna à Courtray, et illecq séjourna douze jours ; durant lesquels douze jours touts ses gents d'armes tindrent les champs en mangeant et pillant le plat pays, lequel estoit et obéissoit au duc , et mesme les villaiges de plusieurs nobles quy estoient avecques le duc. Etdisoit-on que le duc séjournoit à Courtray en attendant argent; et entre temps laissoit ses gents manger tout le plat pays, pourtant qu'ils n’estoient point payés. Et avecques ce le duc, en plusieurs bonnes villes, commença à faire contraindre les nobles, marchands et bourgeois des lieulx, lesquels ne le servoient point, de lui prester certaine somme de deniers , chascun selon son estat, nonobstant que pour ce nelaissoient point à estre levés par lesdictes bonnes villes plusieurs mal-tostes et subsides. Desquelles choses lesriches hommes avecques le peuple commencoient à murmurer. Et n’estoit point le peuple si malcontent de payer lesdicts deniers (car ils appercevoient bien qu’il en avoit affaire), qu’ils estoient de ce qu’on disoit qu’au prouffit du duc ny à sa Cognoissance ne venoit point tout l’argent qu’on exigeoit, non pas à peu près la moictié , et qu’aulcuns recepveurs et aultres, ne scais quels, officiers affamés, quy estoient autour du duc, engloutissoient tout. Desquelles choses je ne certifie rien, trop bien que la renommée du peuple estoit telle; et m’en rapporte à ce quy en est.