LIVRE V, CHAP XXIV

mille francs, et les aultres pays chascun leur pooir. Ce temps pendant, au commandement du duc de Bourgoingne et du comte de Charrollois, se meirent sus: Loys, comte de Sainct- Pol , le comte de Bryene, le comte de Marles, le seigneur de Roussy ses enfants, Jacques de Sainct-Pol, frère dudict comte, Adolphe de Clefves, nepveu du duc, les bastards de Bourgoingne, Anthoine et Baulduin, et presque touts les chevalliers et nobles hommes des pays d'Artois, Boullenois, Haynault, Flandres, Hollande, Zélande, Brabant, et aultres pays, touts en armes et noblement accompagniés, et en sy grand nombre que on les estimoit à quatorze cents lances, huict mille archiers, et le demourant crannequinniers, coullevriniers, coustilliers et aultres gents de guerre, sans les compagnons quy gardoient le carroy, quy estoit grand nombre ; chascun portoit ung mallet de plomb. A vec lesquels nombre de gents de guerre n’estoient point ceulx du pays de Bourgoingne, lesquels aussÿ se meirent sus en armes, jusques au nombre de cinq à six cents hommes d'armes, chascun portant lances, sans les aultres gents de guerre. Avec lesquels Bourgoingnons estoient : le mareschal de Bourgoingne, le prince d'Orange, le comte de Charny, le seigneur de Boullenghuien et aultres grands seigneurs, desquels les noms, tant de ceulx quy estoient avecq le comte de Charollois comme avecq les Bourgoingnons, seroient trop longs à raconter, et sy ne les scaurois touts nommer.

Durant ce temps que les gents d’armes se mectoient sus, ung gentilhomme nommé Jehan de Longueval, seigneur de Vaulx, capitaine des archiers du bastard de Bourgoingne, accompagnié de plusieurs gents de guerre, le premier jour de may, environ le midy, entra en la ville d'Arloeux, en laquelle le roy de France avoit faict mectre nouveaulx officiers , et à Crèvecœur, et à Sainct-Souplet ; et d’illecq ledict Jehan alla à Crèvecœur; et y entra cedict jour environ quatre heures après midy.

Duquel lieu aulcuns maulvais de là dedans s’estoient partis pour doubte du bastard de Bourgoingne, vers lequel ils pensoient bien avoir mesprins; et estoient allés demourer à Cambray, et ailleurs au Royaulme. Quand icelluy Jehan et ses gents feurent dedans ladicte ville, ils allèrent au chastel auquel estoit le baillv dudict lieu, quy demanda à quy ils estoient, et

quy les envoyoit illecq. À quoy Jehan de Longueval respondit : qu'ils estoient au bastard de Bourgoingne, et qu'il les laissast dedans, ou ils entreroient par force. À quoy ledict bailly, quy mis estoit par le roy, dit : qu'il n'estoit point fort assez pour tenir contre eulx, ct puis qu'ils y venoient par force, eulx scachants que le roy de France le avoit illecq commis, que au moings ils le laissassent vuidier saulf son corps et ses biens ; ce quy luy feut accordé. Et entra icelluy Jehan; et vuida ledict bailly quy estoit de Normandie. Ce faict, se partist Jehan de Longueval , et y laissa en garnison cent compagnons de guerre, et «y en envoya dedans Arloeux.