CHAPITRE XXX

Comment le comte de Charrollois se partist,et toute son armée, du pont Sainct-Cloud pour aller allencontre du duc de Bretaigne, quy ne pooit passer, pour les geuts du roy ; et comment il sceut que le roy de France yenoit hastivement pour le ruer jus.

Le quinziesme jour de juillet mil quatre cents soixante-cinq, le comte de Charrollois et toute son armée quy s’estoient partis du pont Sainct- Cloud pour tirer vers Estampes et aller allencontre des ducs de Berry et de Bretaigne, lesquels ne pooient passer pour l’armée du roy de France quy les empeschoit, arrivèrent à Montle-Héry et environ ; et alla le comte de Sainct- Pol, quy menoit l'avant-garde, jusques le Montle-Héry ; et se logea luy et ses gents en la ville de Mont-le-Héry, sur ledict mont, sans entrer au chasteau. Lequel chastel estoit garny de gents de guerre y commis de par le roy, auquel le comte ne feit quelque assault, ne ceulx de dedans ne feirent quelque signe de guerre. Le comte de Charrollois, quy menoit la bataille, se logea à deulx lieues près du mont, et le bastard de Bourgoingne, quy menoit l’arrièregarde, se logea à deulx lieues près du comte, et à quatre lieues du mont. Le comte de Sainct- Pol, quy estoit sur le mont, envoya ses escoutes tout environ luy, desquels aulcuns allèrent jusques à Chastres, à trois lieues du mont, tirant vers Estampes ; lesquels retournés certiffièrent au comte que le roy de France et toute sa puissance estoit à Chastres et environ, commg il estoit vrai. Il estoit environ onz8 heures en la nuict quand le comte de Sainct-

Pol oyt ces nouvelles, pour lesquelles il se deslogea du mont; et vint logier au-dessous du mont, en la vallée, en une campaigne au lez devers Paris, et feit scavoir les nouvelles au comte de Charrollois, luy mandant qu'ilse hastast de venir, et que le roy luy livreroit bataille le lendemain au poinet du jour. Le comte, de ce adverty, se hasta moult fort d’aller où le comte de Sainct-Pol estoit, et manda au bastard de Bourgoingne qu'il se hastast, comme il feit ; et le lendemain, seiziesme jour du mois de juillet, environ soleil levant, le comte de Charrollois vint où le comte de Sainet-Pol estoit, et l’arrière-garde, que menoit le bastard de Bourgoingne, vint avec eulx ; et illecq ordonnèrent leurs batailles et se meirent en ordonnance.