LIVRE V, CHAP, XXXI
les Bourguignons, quy encoires n’estoient arrivés devers luy pour les garnisons du pays du roy quy les empeschoient , ne que les princes de France feuissent assemblés avec luy. Et jàsoit-que la pluspart feust de pareille opinion, toutesfois ung hardy et valliant chevallier, nommé messire Pierre de Brésé, seigneur de la Varenne et séneschal de Normandie, dit au roy que ce n’estoit point son conseil de ainsy le faire ; car il cognoissoit le comte de Charrollois, et qu’il n’estoit pas homme de desmarchier, et que les Picards et ceulx quy estoient avecq luy de ses pays l’aimoient de sy grand couraige, et sy estoient la pluspart gents accoustumés de guerre, lesquels ne le lairoient jusques à la mort ; mais estoit son opinion de premier combattre les ducs de Berry et de Bretaigne, avec lesquels avoit plusieurs gents de guerre quy avoient esté des ordonnances du roy Charles, son père; lesquels , quand ils verroient sa présence, ils n’oseroient combattre contre luy, ains se tourneroient de son party, par quoy de légier il metteroit le remenant 1 à mercy. Auquel séneschal feut dict qu’il avoit paour ; lequel feit response que non avoit, et s’il y avoit journée de bataille ne rencontre, il monstreroit que ce qu’il disoit, il ne le faisoit de paour, mais seulement pour loyaulment conseiller le roy. En la fin, le roy se conclud de premier combattre le comte de Charrollois; et hastivement feit commandement sur la hart, que chascun le sievist. Et chevaulcha le quatorziesme jour de juillet, que de jour, que de auict, luy et son ost, vingt-quatre lieues ; et alla au giste à Estampes, et le lendemain à Chastres, à trois lieues du Mont-le-Héry; et passa assez près, comme à six ou huict lieues près de lost des ducs de Berry et de Bretaigne, et non scachant, que les messagiers qu'ils avoient envoyés à Paris feuissent prins ne que le comte de Charrollois feust sy près de luy, le seiziesme jour de juillet, devant le jour se deslogea de Chastres, et ung peu devant soleil levant, luy et son armée se trouvèrent sur le Mont-le-Héry, dessous lequel mont ils veirent le comte de Charrollois et toute son armée. Ce voyant le roy, et scachant que c’estoit le comte
de Charrollois, sy feit mectre ses gents en or-
donnance et bataille. Il ordonna trois batailles : en la première bataille, que on appelle l'avant.
(4) Reste.
garde, estoit le dessusdict monseigneur Pierre de Brésé, chevallier, seigneur de la Varenne et séneschal de Normandie, le fils du comte de Noyrenton, le seigneur de Barbasan, Malortie, Flocquet, Salzart, et aultres capitaines et gents d’armes ; en la seconde, que on appelle la bataille, estoit le roy avecq plusieurs grands seigneurs et capitaines ; en la tierce, que on appelle l’arrière-garde, estoit le comte du Maisne, et bien sept à huict cents hommes d’armes. Et disoit-on que ès dictes trois batailles y avoit deulx mille deulx cents hommes d’armes portants lances, les mieulx en poinct et les miculx montés que gents d'armes feurent oncques ; et là estoit la fleur des gents de guerre, toute la puissance du roy de France. Avec eulx estoient les archiers et aultres gents de guerre, quy estoient en grand nombre, combien que plusieurs feuissent demourés derrière, quy estoient mal montés et à pied, pour le grand chemin que le roy feit en haste.
