CHAPITRE XXXIV
Comment aulcuns de Paris saillirent hors detla ville et prindrent les fuyants de la bataille quy avoient abandouné le comte de Charrollois.
Avant que la bataille de Mont-le-Héry commenca, trois des héraults du roy de France se partirent de son ost et s’en allèrent à Paris, où ils vindrent environ midy. Illecq, à son de trompe, allèrent parmy la ville crier alarme, et que tost on allast à l’aide du roy, lequel se combattoit au comte de Charrollois; mais oncques, pour cris qu’ils fissent, la commune ne se bougea; mais Joachim Rohault, mareschal de France, avecq environ cinq cents hommes de guerre qu'il avoit avecq luy, touts à cheval, partirent prestement de Paris et s’en allèrent au pont Sainct-Cloud, où ils ne trouvèrent personne des gents du comte de Charrollois; car ceulx que le comte avoit laissiés pour garder le pont, ils abandonnèrent et s’enffuirent quand ils veirent les seigneurs d’Emeryes, Haplincourt, Inchy et aultres sans nombre fuir, et disoient que le comte avoit tout perdu. Le mareschal entra dedans la ville, et toutsles fuyants quy depuis y vindrent détint prisonniers, dont
(1) Fossés.
il y olt grand nombre, el les mena à Paris. Les seigneurs d'Emeryes, Inchy et aultres quy estoient passés parmy le pont Sainct-Cloud, fuirent jusques au pont Sainct-Maxence, cuidants passer la rivière d’Oyse; mais ils ne peurent, pour le seigneur de Mouy, capitaine de Compiègne, et plusieurs gents de guerre des garnisons de Corby, Senlis, Clermont, Crespy et aultres places, lesquelles avoient jà oy nouvelles de la bataille, et cuidoient que le comte de Charrollois olt tout perdu, et que le roy euist eu la victoire; pour quoy ils s’estoient assemblés, et estoient allés mectre le siége au pont Sainct-Maxence, du costé vers Mont-Didier; et livrèrent ung assault au pont, par lequel assault ceux de dedans se rendirent, saulf leurs biens. Là feurent prins le seigneur d'Emmeryes et moult d’aultres; le seigneur de Haplincourt feut prins entour Paris et mené à Paris. Pour brief dire, oncques nul homme de nom de ceulx quy s’enfluyoient n’eschappèrent qu’ils ne feuissent prins, ou morts, ou noyés, et en feit-on à Paris plusieurs noyer. Aulcuns povres compagnons eschappèrent sans esire prins ou morts; lesquels retournèrent touts deschirés et en povres habits, après qu’ils avoient esté touts desrobbés. Devant le pont Sainct-Maxence feut tué d’ung engin à pouldre, de ceulx de dedans, ung gentilhomme du costé du roy, nommé Jehan de Gronce, frère au seigneur de Griboval, natif de Picardie ; Mais il tenoit la partie du roy, pour ce qu’il avoit esté au pays de Vallois, quy luy venoit de par sa mère, et son frère estoit avecq le comte de Charrollois.
