CHAPITRE XIV

Comment les Flamands retournèrent de devant Mont-Didier, quoique le duc de Bourgongne leur feist remonstrer, el feurent conduicts en leur pays par le duc de Brabant, frère au duc de Bourgongne.

Or fault parler du duc de Bourgongne, et comment il s’en alla de Roye devant Mont- Didier, et là fut par aucuns jours logié. Là se commencèrent Flamands fort à lasser de tenir les champs, et envoyèrent leurs capitaines devers le duc de Bourgongne, demander congé de retourner en Flandre, disants qu’ils avoient servi autant de temps qu'on leur avoit requis et que promis avoient. Le duc de Bourgongne les cuida bien retenir ; et par plusieurs fois leur remonstra et fit remonstrer que ses ennemis estoient prests, et de jour en jour attendoient la bataille, en leur requérant qu'ils voulsissent demourer avec lui encore huit jours tant seulement. Les capitaines des Flamands assemblèrent leur commun, et leur remonstrèrent la requeste que leur faisoit leur seigneur ; mais, pour