CHAPITRE XX VII
Comment les François meirent le siége debvant la ville de Caen el comme ils gaignèrent ung boullevert.
Après que la ville de Sainct-Saulveur feut mise ès mains du roy de France, les dessusdicts mareschaulx se partirent d'illecq atout leur compagnie, et chevauchèrent jusques à deulx lieues près de Caen, en ung villaige nommé Cheulx ; et là trouvèrent logiés le connestable de France, le comte de Laval, le seigneur de Loheach , son frère, mareschal de France , et le mareschal de Bretaigne. Et y trouvèrent aussy messire Jacques de Luxembourg, frère du comte de Sainct-Pol , les seigneurs d’Estouteville et de Malestroict, de Sainct-Sévère et de Bousacgq, et plusieurs aultres chevalliers et escuyers; touts lesquels, le cinquiesme jour de juin, se partirent dudit lieu de Cheulx , et s’en allèrent logier ès faulxbourgs de la ville de Caen , du costel devers Bayeulx, devers l’abbaye de Sainct-Estienne, près la muraille de la ville. Et pareillement se logèrent les comtes de Clermont , de Chastres, et les seigneurs de Mongascon, de Mouy, gouverneur de Beauvoisin; messire Geoffroy de Couvran , messire Charles de la Fayette, Robert de Flocques, bailly d’Evreulx, et plusieurs aultres chevalliers et escuyers, jusqu’au nombre de quatorze cents lances et de quatre mille et cinq cents archiers, coustelliers et guisarmiers à cheval, et deux mille francs archiers à pied, lesquels ce jour estoient partis de Vernoeul. Et se logèrent ès faulxbourgs de ladicte ville, ce jour mesme, du costel de devers Paris, avec le comte de Dunois, lieutenant général du roy de France , le grand-maistre-d’'hostel, le seigneur de Jaloingnes, son frère d'Orval, de Montenay, gouverneur des gens du duc d’Allencon , le sieur d'Ivry, prévost de Paris; le sieur de Beaumont , son frère , et plusieurs aultres chevalliers et escuyers, jusques au nombre de six cents lances et de deux mille
cinq cents archiers, guisarmiers et coustelliers à
chevalet deux mille francs archiers à pied, quy s’estoient partis de demy-lieue de là. Par la manière dessus déclarée, feat la ville assiégée de
deux costels. La ville ainsy assiégée que dict est, les François, incontinent, feirent faire ung pont au-dessus de la ville pour passer la rivière , pour aller d’ung costel à l’autre, et secourir l’ung l’aultre sy besoin estoit ; etle quatriesme jour après, passèrent dessus icelluy pont les comtes de Nevers et d’Eu, le seigneur de Beuil, celluy de Montenay, et Joachim Rohault, à grande compagnie de gents de guerre ; lesquels s’en allèrent logier ès faulxbourgs de la ville, du costel de devers la mer, en une abbaye de dames nommée la Trinité; et dès le premier jour que les François y meirent le siége, incontinent qu’ils y feurent arrivés, assaillirent le boullevert dela porte quy va à Bayeulx; et illecques y eust faict des beaulx faits d'armes, tant qu’à la fin icelluy boullevert feut prins d’assaut ; mais les François le laissèrent despuis, pource qu'il estoit ouvert du costel devers la muraille de la ville; et semblablement demoura désemparé des Anglois, pource que, incontinent après la prinsed’icelluy boullevert, ils murèrent leur porte.
