CHAPITRE XX VI

Comment les François prinrent Bricquebecq et Valloingnes ; et du siége quy feut mis debvant Sainct-Saulveur-le-Vicomte, et comme enfin la ville feut mise en l'obéissance du roy de France.

Après la conqueste de la cité de Bayeulx, le comte de Dunois, atout son ost, passa la rivière d’Orne; et aussy feit le comte de Clermont et ceulx de sa compagnie ; puis menèrent leurs gents vivre sur le pays, en attendant la venue du connestable de France et de ses gents ; lesquels cependant prindrent Bricquebecq, et meirent le siège devant Valloingnes, laquelle se rendit assez tost après, parce que le lieutenant du capitaine quy en avoit la garde, de par le

roy d'Angleterre, s’estoit faict Francois. Ils estoient dedans six vingts Anglois, lesquels allèrent, leurs corps et leurs biens saulfs, à Chierbourg. Cependant, les mareschaulx de France et de Bretaigne meirent le siége’ devant Sainct- Saulveur-le-Vicomte, quy est une moult belle place, etune des plus fortes de Normandie. Illecq feirent touts sy valliamment et grandement leur debvoir qu’en peu de temps meirent ceulx de la place en grande nécessité , et les oppressèrent fort de trenchis ; et à l’advancement feut occis ung vaillant escuyer du pays de Berry, d’ung traict ; lequel on nommoit Jehan Manchefort. Et en icelle place estoient deux cents combattants anglois, dont estoit chief et capi- - taine le seigneur de Robersart. Lesquels Anglois se rendirent aux François, sans coups de canon ne d’engins , car toute l'artillerie estoit

demourée chargée à Bayeulx, pour mener à Caen ; lesquels Anglois, leurs corps et biens saulfs , s'en allèrent à Chierbourg, et eurent espace de huict jours à vider leurs biens.