CHAPITRE XLII

Des préparations que ceulx d'Arras feirent pour la garde de la ville et cité, attendant le siége du roi.

Alors le duc de Brabant et la comtesse de Haynault estoient à Cambray, qui envoyèrent devers le roy, luy requérant de povoir venir devers lui; mais le roy ne le volut pas, et fut content d'envoyer devers eux son ambassade ; c’est assavoir le baron de Yvoy en Normandie, et le seigneur de Ligne, de Ha ynault, bien instruits pour communiquer avec le duc de Brabant et la dame de Haynault. Mais nullement ne se polrent accorder, et revindrent devers le roy ; et le duc de Brabant et la comtesse de Haynault s’en retournèrent devers le duc de Bourgongne. Après le siége de Bapasme, ceux dela ville d’Arras s’attendirent tout seurement d’avoir le siége, comme ils eurent ; et sachant la grand’puissance que le roy avoit, firent grand’préparation pour eulx deffendre et fortifier leur ville ; et furent bollevers faits au-devant des portes, de gros chesnes plantés par grand’maistrise, et barrer et fossoyer en divers lieux. Et si se pourvéirent de toutes autres choses à eux nécessaires ; et avec ce firent ordonnances que messire Jean de Luxembourg, leur capitaine, fit publier à son de trompe ; c'est assavoir que tout bourgeois, manants et habitants de la ville, et aultres, de quelque estat qu’il fust, se pourvéissent du moins pour six mois, ou qu'ils vuidassent la ville, et pareillement les gens de guerre. Après lesquelles publications, aucuns bourgeois et habitants menèrent leurs femmes et leurs enfants,