CHAPITRE LVI

€omment le roy d'Angleterre descendit et print port entre Honfleur et Harfleur, laquelle, par faute de secuurs, luy feut rendue.

Ne demoura gaire, apprès la justice faicte, que le roy d'Angleterre se prépara de tous points pour monter sur mer, et tirer vers France. Sy advint, quand le roy feut monté en son havire, et toute la compaignie preste pour partir et passer en France, comme il fist, une grand'aventure ; advint que le feu se frappa en aulcuns de ses navires de ses gens; et y eut trois gros navires ars et péris, et tout ce quy estoit dedans , ou peu s’en fallust ; et tellement atteint le feu, que depuis que lesdits navires feurent espris, presque tous feurent consommés par feu. Le mairien d'’icelle navire ardoit tout clair en l'eau. Et feut bien grand’ adventure qu'il n’y eust plus grand meschief; mais chaeuh navire se tira arrière du feu, car nul ne l’osoit approcher. Icelles deux adventures advinrent au roy d'Angleterre avant son partement, dont pluiseurs de ses gens s’en esmerveillèrent fort, et doubtoient plus grands inconténients. Pour lesquelles adventures en y eut aulcuns quy conseillèrent au roy de non aller

lus avant ; mais il ne les voulut croire, et passa à mer luy et toute son armée. Et tant exploitèrent de nager que par une nuit, veille de l'Assomption de Nostre-Dame, ils prinrent havre entre ung port, quy est entre Honncfleur et Harfleur , où l’eau de Seine choit en la mer; et povoient bien estre huit cents vaisseaulx, chargés de gens et habillements de guerre; et

que tous feurent descendus, le roy d'Angleterre se logea à Guerarville, en une prioré, et le duc de Clarence et de Glocestre , ses frères, assez près de luy, et les aultres où ils se peurent le mieux. Et apprès che, asségièrent la ville de Harfleur, qui estoit la clef de la mer de toute Normandie, et formèrent le siége, ainsy qu'ils ont accoustumé de faire. Si feirent leurs approches, dressèrent leurs engins et bombardes, et commencèrent à battre la ville de tous costés. Dedans Harfleur estoient entrés, avec ceulx de la ville, environ trois cents hommes d’armes francois, pour garder la ville, entre lesquels estoient le seigneur d’Estouteville , capitaine de par le roy, les seigneurs de Blainville, de Hacqueville, de Harmenville, de Bréauté, de Gaucourt et pluiseurs autres. Quand les Anglois eurent mis le siége , ils envoyèrent leurs fourriers devers le pays, prendre prisonniers, vivres et aultres choses à eulx nécessaires, et les amenèrent en leur ost, en faisant tous les maulx que faire se povoient. Le roy d'Angleterre alloit souvent autour de la ville, pour visiter les lieux les plus convenables pour asseoir ses gros engins, et des pierres qu'ils jettoient feurent fort endommagés ceulx de la ville qui se défendoient très bien; mais ne leur profitta gaires ; car les Anglais, par le traict de leurs archiers, les rebouttoient à force dedans la ville. Or advint une moult mal adventure à ceulx de la ville; car en ce temps le roy leur envoyoit grand foison de poudre et traict. Le roy d’Angleterre en feut adverti; sy envoya hastivement de ses gens au-devant, qui les prinrent et les amenèrent en son ost. Durant iceluy siége, le roy envoya grands gens en la cité de Rouen, et en la frontière contre les Anglois ; lesquels Francois très diligemment gardèrent le pays, tant que les Anglois estants devant Harfleur, ne prinrent ny chasteau ny ville dedans le pays, jà-soit que les Anglois y travaillèrent assez le plat pays pour quérir vivres; car ils eurent grand deffaute de vivres, pour ce que ceulx que ils avoient amenés d'Angleterre estoient jà tous faillys et gastés de l’air de la mer. Et avec che férit en eulx maladie de cours de ventre, dont moururent bien deux mille ou plus, et entre lesquels feurent les plus principaux, le comte de Staffort, l’'évesque de Nordvich , le seigneur de Beaumont , le seigneur de Tromplanton , et

messire Brunel, avec pluiseurs aultres nobles. Néantmoins le roy d’Angleterre, en grand’ diligence et labeur, persévéra toujours en son siége, et feit faire trois mines par-dessous la muraille, qui estoient prestes pour eflondrer; et avec che feit par ses engins abattre grand” partie des portes, tours et murs d’icelle ville. Par quoy finallement feurent mis ceulx de la ville en telle nécessité qu’il leur convint prendre traictié avec le roy d'Angleterre, qui feut tel : qu'ils se rendroient tous prisonniers, la vie sauve, moyennant qu'ils auroient jour compétent de rendre la ville, au cas que à che jour ils ne aurojent secours. Icelluy traicté feut des parties accordé. Et envoyèrent les François devers le roy et le duc de Guyenne, pour luy dénonchier le traictié , tel que dessus est dict, et aussy sy ils seroient secourus. Les messaigiers trouvèrent le duc de Guyenne à Vernon sur Seine; lesquels luy remonstrèrent l'estat et la nécessité de ceulx de Harfleur, qui servoient le roy etluy, de avoir secours en dedans les jours qui estoient accordés. Mais à brief dire, il leur feut respondu que la puissance du roy n’estoit pas encore assemblée ni preste pour bailler secours si hastivement. Et sur che retournèrent les messaigiers, c’est assavoir le seigneur de Hacqueville, quy feit son rapport; dont tous les nobles et ceulx de la ville feurent moult troublés.

Vous avez ouy comment les ambassadeurs de Harfleur feurent à Vernon, parler au duc de Guyenne, et la response qu'ils eurent ; pour laquelle cause il leur convint rendre la ville. Laquelle reddition se feit par la manière que dessus est dicte ; qui feut une piteuse chose à ouyr à ceux quy estoient dedans la ville. Apprès qu’il feut venu à la cognoissance du roy comment la ville de Harfleur estoit rendue ès mains de son adversaire , le roy d'Angleterre, doubtant qu'il ne voulsist faire d’aultres emprinses sur son royaulme, afin de y résister, feit mandement par tous ses pays pour avoir plus grand nombre de gens d'armes qu’il y pust finer ; et avec che rescript par toutes les bonnes villes le desroy en quoy il estoit mis par-devers le roy d'Angleterre. Pourquoy il commandoit à tous ses subjects et vassaulx, tant en Picardie comme aultre part, que tous, à la puissance qu’ils polroient finer, le venissent servir allencontre de son adversaire le roy d'Angleterre; et mandoit