CHAPITRE LVIL
Comment le roy d'Angleterre entra dedans la ville de Harfleur ; du traictement qu'il feit aux gens de guerre, aux manans de la ville et aux gens d'églises; d'une embusche que les Franchois feirent sur les Auglois pendant le siége de ladite ville.
Or est vrai que, quand apprès les traictiés faicts entre le roy d’Angleterre et ceulx de la ville de Harfleur, et que les portes feurent ouvertes, et ses commis entrés dedans, à l'entrée qu'il feit dedans, descendit de chevalet se feit deschausser: et en telle manière alla jusques à l’église Sainct-Martin , paroissiale de ceste ville, et feit son oraison, regrasciant son Créateur de sa bonne fortune.
Et apprés qu'il eut che fait, il feit mettre prisonniers tous les nobles et gens de guerre qui estoient la dedans ; et depuis, brief ensuivant, feit mettre leurs noms par escript ; et puis leur feit faire serment sur leur foi qu’ils se rendroient tous prisonniers en la ville de Calais , en dedans la Sainct- Martin ensuivant : et sur che partirent. Et pareillement feurent mis prisonniers grand partie des bourgeois; et fallut qu'ils se rachetassent avec grands finances; et avec che feurent boutés dehors; et aussy feurent la plus grand’ partie des femmes, avec leurs enfants; et leur bailla-t-on, au partir, chacun cinq sols et une partie de leurs vestements. Sy estoit piteuse chose à ouir les regrets piteux et lamentations que faisoient iceulx habitants, délaissantsainsy leur ville avec tous leurs biens. Avec che feurent licenciés tous les prestres et gens d'église. Et tant que à parler des biens quy feurent là trouvés, il y en avoit sans nombre quy demourèrent au roy d'Angleterre.
Toutefois deux tours quy estoient sur la mer
moult fortes, se tinrent environ deux jours apprès la reddition de la ville, et se rendirent comme les aultres. En apprès, le roy d’Angleterre envoya aucuns de ses prisonniers en Angleterre ; c’est assavoir les seigneurs d’Estouteville et de Gaucourt, sur la navire sur quoi il estoit venu, et les biens que il avoit trouvé dedans la ville, et aussy grand nombre de gens malades, entre lesquels estoient le duc de Clarence, le comte d’Arondel et pluiseurs nobles hommes. Et disoient les aucuns que le siége estant devant Harfleur, le roy d'Angleterre avoit bien perdu cinq cents chevaliers et escuyers, sans compter les aultres quy y moururent tous d’icelle maladie, appelée flux de ventre. Durant le siége devant Harfleur, pluisears grands seigneurs de France se assemblèrent cinq à six mille chevaux ; lesquels eurent avis de eulx trouver ensemble le plus près que ils polroient bonnement du siége du roy d'Angleterre, et que ils mettroient grosses embusches au plus près que faire les polroient. Apprès, envoyërent courreurs sur le siége, afin de faire saillir les Anglois. Ainsy feut faict. Et feurent trois embusches ordonnées. Icelles ordonnances faictes , feurent ordonnés courreurs pour courrir sur le siége. Des courreurs estoient pluiseurs nobles hommes, entre lesquels estoient les seigneurs de l’Isle-Adam, et messire Jacques de Brimeu, quy depuis feurent frères de la Toison -d’Or , et lesquels deux feurent prins à icelle course. Or est vray que, ainsy que comme il avoit esté ordonné, les courreurs se trouvèrent devant le siége des Anglois, et fcirent crier alarme ; et tantost Anglois à cheval; et chassèrent Francois chaudement ; et sans ordonnance de eulx retraire où il leur estoit ordonné, se prinrent les courreurs. Et pour che jour, les Anglois estoient en adventure de perdre une grand’ perte, sy la chose eust esté bien conduite, mais le baron d’Yvry se montra trop tost; pourquoi les Anglois laissèrent de chasser les François, et retournèrent en leur siége à peu de perte. Et à icelle course feurent prins le seigneur de l’Isle-Adam et messire Jac. ques de Brimeu ; et les prinrent les gens du seigneur de Robersart, natif de Haynault, lequel estoit Anglois et at service du roy d’Angleterre, luy troisiesme defrères. Apprès che quele roy d'Angleterre eust prins la ville de Harfleur, il feit réparer les murs de la ville, et puis y mit
MÉMOIRES DE SAINT-REMY
en garnison le duc d’Exetre, avec cinq cents hommes d'armes et quinze cents archers; et feit fournir la ville de vivres et de artillerie.
