CHAPITRE CXXX

Comment les ducs de Brabant et de Glocestre se submirent touchant leur procès à l'occasion de dame Jacques de Bavière, que chacun disoit estre sa femme, sur les ducs de Bethfort et de Bourgongne ; et comment le duc de Glocestre refusa l'appoinctement par iceulx faict.

Vous avez ouy comment la duchesse de Brabant laissa le duc de Brabant, son mary, et s’en alla en Angleterre avec le seigneur de Robersart. Or est vray que jà-soit-ce qu’elle fust mariée au duc de Brabant, si fut le mariage faict d’elle et du duc de Glocestre, oncle du josne roy d'Angleterre et frère du duc de Bethfort, lors régent de France. Auquel mariage sourdirent pluiseurs procès, divisions et guerres, car le duc de Brabant maintenoit qu’elle estoit sa femme, et à ceste cause se disoit seigneur de Haynault, de Hollande, de Zélande et de Frise; et pareillement se disoit le duc de Glocestre ; dont de prime face s’esmeult procès en cour de Rome. Et disoit le duc de Glocestre que le mariage du duc de Brabant et de la dame ne pourroit riens valloir pour pluiseurs raisons : et première que la mère de ladite duchesse avoit tenu sur les saints fonts de baptesme le duc de Brabant, et avec che, ladicte dame estoit sa cousine - germaine. Le duc de Brabant, jà-soit-ce qu’il fut ainsy, sy l’avoit-il, par dispensacion, espousée en face de saincte Eglise. Aulcuns de leurs amis, véants que le procès estoit taillié de longuement durer en cour de Rome, trouvèrent manière, et firent tant que les deulx ducs de Glocestre et de Brabant se submirent sur les deulx dues de Bethfort et de Bourgongne; et jour fut prins de déclarer l’appoinctement quy faict en seroit par les princes dessusdicts.

Or est vray que pour avoir advis et besogaier en ladicte matière, le duc se trouva à Paris, devers le duc de Bethfort ; et furent assemblés leurs conseillers en grand nombre; et par grand’ et meure délibération fut l’appoinctement faict et mis par escript, et envoyé aux ducs de Glocestre et de Brabant, qui tous deulx se disoient marys de ladite dame. Or est vray que le duc de Brabant fut très content du-