CHAPITRE CXXXI

Comment :le duc de Bourgongne espousa madame Bonne d'Arthois, sœur du comte d'Eu, sa belle tante; du mariage de monseigneur Charles de Bourbon à la sœur dudict duc de Bourgougne, nommée Agnès; du trespas de Jehan de Bavière, oncle du duc et duchesse de Brabant, qui délaissa le duc de Bourgongne son héritier.

Après que le duc eult besongnié à Paris pour le faict du duc de Glocestre, il se partit pour aller en Bourgongne, où il espousa madame Bonne d’Arthois, sœur du comte d’Eu, vefve de feu le comte de Nevers, son oncle, par dispensacion du pappe ; laquelle dame n’estoit pas nommée Bonne sans cause, car de mieulx renommée de: bonté n’avoit point au royaulme.

Après que le duc eult espousé ladicte dame et besongné en ses affaires en Bourgongne, il s’en alla en la ville de Mascon, où il trouva le duc de Savoye son cousin-germain, et les ambassadeurs du duc de Bretaigne. Et là vindrent aussy devers luy les ambassadeurs du daulphin, dont estoit le principal monseigneur Charles de Bourbon; après, l’archevesque de Rheims, l’évesque du Puy et pluiseurs aultres. Et là fut faict le mariage de monseigneur Charles de Bourbon et d’une des sœurs du duc, qui furent fianchés et les promesses faictes ès mains de l’archevesque de Rheims, quy là estoit, comme dict est. En ce temps, trespassa Jehan de Bavière, oncle du duc et de la duchesse qui lors avoit espousé le duc de Glocestre ; et pour ce qu'il n’avoit nuls enfants, ordonna le duc son héritier, et délaissa de tout sa niepce, que on nomma duchesse de Glocestre. En ce mesme temps, Arthur de Bretaigne, comte de Richemont, quy avoit espousé la sœur du due, comme devant est dict, s’en alla devers le daulphin, et demoura de son party ; et le fit le daulphin connestable de France.