CHAPITRE CXXXII

Comment le duc de Glocestre et la duchesse descendirent à Cala's et tirerent à Valenciennes, où ils ne peurcnt entrer, et de la à Mous, où elle fuit ses remonstrances, et feul le duc de Glocestre receu pour seigneur.

Le duc de Glocestre et la duchesse descendirent à Calais atout grant armée, et prindrent le chemin pour aller en Haynault ; et tant exploitèrent chemin que ils se trouvèrent auprès de Valenciennes, espérants entrer dedans ; mais ceulx de la ville ne les vouldrent laisser entrer dedans; pourquoy se party et tira droict en la ville de Mons, où il fut receu moult honorablement. Et là estoit la comtesse douagière de Haynault, mère de la duchesse de Glocestre. En ceste ville furent mandés les trois Estats, pers et hommes de la comté de Haynault, où la pluspart de ceulx du pays y furent et non pas tous ; et là leur fist remonstrer la duchesse comment elle avoit eu espousé le duc de Brabant contre sa volonté, entendu qu'il avoit esté tenu sur fonts de par madame sa mére, et aussy qu'il estoit son cousin-germain; et comme bonne catholicque, pensant aux choses dessusdictes touttes et quantefois qu’elle alloit coucher avec luy, trembloit comme la feuille en l'arbre, scachant le grant péché qu'elle commettoit. Ces choses considérées, du consentement de la comtesse sa mère, s’en estoit allée en Angleterre, où elle s’estoit mariée à très hault et très puissant prince Honfroy, fils, frère et oncle du roy d'Angleterre, lequel elle avoit espousé en face de saincte Eglise, requérant à ceulx du pays de Haynault qu'ils le receussent à seigneur, et lui feissent le serment de fidélité, laquelle chose fut faicte.