CHAPITRE CXXXIII
Comment la ville de Brayne, en Haynault, fut rendue au duc de Brabant ; et comment les Brabanchons retournèrent en leur pays.
Quand le duc ouyt dire que le duc de Glocestre estoit entré dedans le pays pour icelluy pays conquester, il se prépara en toute diligence pour retourner en son pays d’Arthois, pour conforter et ayder le duc de Brabant, son cousin. Or, est vray que la pluspart des gens de guerre du pays de Picardie se mirent sus pour aller au duc de Brabant. Quand le duc de Brabant sceult
MÉMOIRES DE SAINT-REMY
la venue du duc de Glocestre en Haynault, il assembla grant nombre de gens de guerre, et tant que son armée fust estimée à plus de vingt mille combattants, sans les aultres du pays du duc. De l’armée du duc de Brabant estoit chief le comte de Sainct-Pol, frère du duc de Brabant. Des aultres pays avoit plusieurs capitaines ; c’est assavoir le comte de Conversan, frère de monseigneur Jehan de Luxembourg, le seigneur de Croy, monseigneur Englebert d'Enghien, le bastard de Sainct-Pol seigneur d'Haubourdin, le seigneur de l'Isle-Adam, le seigneur de Humières, Potton de Sainct-Traille, et plusieurs aultres. Quand icelle armée fust mise ensemble, ils entrèrent au pays de Haynauli, et mirent le siége devant la ville de Brayne, dedans laquelle avoit pluiseurs Anglois. Quand le duc de Glocestre sceult que ses gens estoient asségiés, il assembla le plus grant nombre de gens que il put finer, tant Anglois comme Hainuyÿers, et s’en alla logier en la ville de Soingnies, à une lieue près du siége des Brabanchons; mais touttefois il ne fut point conseillié de les combattre. Et se tint en icelle ville durant le siège qui gaires ne dura; car ceulx de la ville prindrent traictié, qui fut tel, que les Anglois s’en iroient en Angleterre, sans retourner devers le duc de Glocestre, ung baston en leur main, et ceulx de la ville prisonniers, leurs vies saulves. Après la reddition de la ville, fut conclu, par le comte de Sainct-Pol et les nobles de sa compaignie de aller mettre le siège devant Soingnies ; et de fait fut tout ledit appareil pour y aller à lendemain matin. Touttefois il ne fut rien faict, pour che que, devant le jour, les Brahanchons, assistés des gens et communaultés du Brabant, quy là estoient en la compaignie dudict comte de Sainct-Pol, se deslogèrent et chargèrent tentes et pavillons, et s’en retournèrent en leur pays de Brabant, après ce qu'ils eurent arse et destruicte la ville de Brayne ; dont le comte de Sainct-Pol et ses nobles furent moult desplaisants; et furent contraincts de laisser leur entreprinse, et prendre chemin avec les aulitres. Quand le duc de Glocestre sceult le partement des Brabanchons, il issit hors de la ville de Soingnies, en sa compaignie environ six mille combattants, et se trouva aux champs ung peu oultre la ville de Brayne, assez près de une petite vallée où passe un petit ruissel d’eau, là où estoit le comte de Sainct-Pol et les capitaines et
nobles dont dessus est faicte mention, lesquels estoient en belle ordonnance, attendants la bataille du duc de Glocestre; et ceulx du Brabant s’en alloient le grant chemin à Bruxelles. Et quand le duc de Glocestre veit ses adversaires prests pour combattre, il s’arresta en la plache où il estoit et se mit en battaille; et là furent ces deulx battailles l’une devant l’autre, la petite eaue entre eulx deulx, depuis le matin jusques à vespres, sans combattre, synon pluiseurs escarmouches quy se firent entre deulx battailles. Et quand vinst sur les vespres, le duc de Glocestre retourna à Soingnies, et le comte de Sainct-Pol et ses gens vers Bruxelles. Vous avez ouy comment le duc, luyestant en Bourgongne, manda à ses gens de Picardie et d'Arthois qu'ils se armassent pour aller au service de son cousin le duc de Brabant, comme ils firent. Or, est vray que icelles choses faictes, le duc se partist de son pays de Bourgongne, et retourna en son pays d’Arthois pour faire toute assistance à son cousin de Brabant, à l’encontre du duc de Glocestre. Quand le duc de Glocestre sceult que le duc estoit arrivé en Arthois, et qu’il assembloit gens, et avecques che que il avoit veu la copie des mandements que le duc avoit envoyés en son pays de Picardie, et ailleurs, par lesquels il mandoit à tous ses subjects qu'ils allassent ayder et conforter son cousin de Brabant, le duc de Glocestre en prit sy grant despit qu'il en rescripvit au duc bien merveilleuses et poignantes imaginatives lettres, telles et dont la tepeur s'ensuit.
