CHAPITRE CXLI

Comment le duc de Bethfort, régent de France, gaigna la cilé CL comté du Mans par traictié. |

Le régent, luy estant à Rouen, fist ung grand mandement d’Anglois, et les bailla au comte de Sallebry, lequel tout incontinent s’en alla à Raimbouillet, une forte place où estoit une forte garnison de Daulphinois, quy gastoient tout le pays d'environ, mesmement jusques à Paris.

Néantmoins ils se rendirent en habandon, et les Anglois y mirent grosse garnison; puis le comte de Sallebry s’en alla asségier la cité du Mans. Et n’y eurent gaires sis, quant en la cité eurent grand disette de vivres; et s’en issy l'évesque pour trouver aulcun traictié avec le comte de Sallebry, et que la cité ne fust poinct destruite. Lors le conte se prist à traictier. Ce traictié fut faict en la maison des frères prescheurs d’emprès la cité du Mans, le second jour d’aoust , l’an mil quatre cent vingt-cinq. Ainsy doncques le roy Loys, duc d’Anjou, estant à Naples , perdit la comté du Mans, quy tourna à grand déplaisir au duc de Bretaigne, père de la femme du roy Loys ; et lorsque ce vint à la congnoissance du régent, il envoya nottables ambassadeurs devers le duc de Bretaigne, afin que par yre ne se tournast Daulphinois.