CHAPITRE CXLVI
Comment la ville de Zenenberghe et le seigneur qui tenoit le party de la duchesse Jacques de Bavière, se rendirent au duc de Bourgongne; et du trespas du duc Jehan de Brabant, fils d'Anthoine, duquel Philippe, son frère, ful héritier, quy estoit comte de Sainct-Pol et de Ligny, seigneur de Fiennes et chastelain de Lille.
En ce temps furent les ennemis au duc de Bourgongne, qui se tenoient à la Goude, en Hollande, destroussés et rués jus en troislieux ; c’est assavoir à la Brille, à Delft, et en ung aultre lieu, et puis y mist le duc garnison de ses gens, et s’en retourna en Flandres où il assembla plus grand ost que devant, et les mena devant Zenenberghe, forte ville à merveilles, et l’assiégea puissamment. Et estoit léans le seigneur du lieu à grant nombre de gens du parti de la duchesse Jacquelinne. Ceste ville, pour sa force, tenoit en subjection tous les aultres ports de mer de Hollande, de Zélande et de Flandres; car icelle avoit grant deffense par mer, et souffrirent les gens du duc maintes peines durant le siége par les tempestes de la mer et aultrement. Mais, finallement, quand ils eurent sis tout l'hiver et que la famine vint en la ville, ils se rendirent par le traictié qui :
cy-apprès s'ensuit ; c'est assavoir que le seigneur de Zenenberghe, luy, ses subjects, sa ville et forteresse, et touttes ses terres et seigneuries, mist touttes ès mains du duc en sa propre voullenté, leur vie saulve, et tenroient prison à Lille tous les gentilshommes de leans là où le duc leur ordonna.
Item, qu’ils rendroient tous les prisonniers, en quelque place qu'ils aient, quictes et délivrés.
Item, que les bourgeois et habitants de Zenenberghe feront serment au duc comme à leur droicturier seigneur, et le duc leur pardonnera tout che qu'ils ont meffaict contre luy et ès pays de Hollande et de Zelande. Ces choses ainsy traictiées, seigneur de Zenenberghe le et tous les gentilshommes de léans s’en issirent en leurs pourpoints, sans rien emporter, une corde au col, et les bourgeois et les habitants demourèrent en l’obeissance du duc; puis retourna le duc en Flandres pour l'impédimie quy couroit au pays, et mesmement en son ost, dont estoient jà morts le seigneur Humbercourt, son maistre d'hostel, messire Mauroi de Saint-Légier, et aulcuns aultres.
En ce temps trespassa le duc Jehan de Brabant, en son chastel de Lierre, le jeudy absolut, en disant Miserere met, Deus, etc., et fut enterré en sa chapelle de la Vence, où il eult fondé trois messes par sepmaine; son père aussy y estoit enterré. Philippe son frère, quy se feist surnommer de Vallois, comte de Sainci- Pol et de Ligny, seigneur de Frenne ct chastelain de Lille, fut son hoir. Par le moven du duc de Bourgongne, son cousin, fut ordonné duc de Brabant et constitué.
