CHAPITRE CXLVIII

aulcun bon appointement. Quand le duc sceut qu'ils venoient, il les alla attendre à Lille, et là les receut honorablement. Ils tindrent aulcuns parlements ensemble sans rien conclure. Mais quand ils furent retournés à Paris, le régent et le conseil de France envoyèrent nottables ambassadeurs devers le duc et devers le duc de Glocestre, pour trouver moyen de appaiser leurs discors. Et advint que le duc de Glocestre se déporta de venir en Hollande, et de tous points laissa la duchesse en Bavière, dame de Hollande, de Zélande et de Frise, et print à femme une très belle damoiselle angloise, fille du seigneur de Cobam. Aïinssy fut laissiée la duchesse quy, en son temps, avoit eu espousé : le daulphin, fils et héritier de la couronne de France, et depuis, le duc de Brabant et le duc de Glocestre, et apprès eut espousé messire Franck de Borsel, zélandois, auquel le duc donna, pour l’honneur d'elle, titre de comte, et feut nommé comte d’Ostrevant, comme il sera dict cy-apprès. Or furent unes courtes trefves tenues entre eulx, pour veoir che temps pendant se on ne les pourroit mettre d’accord ; mais comine les Hollandois se entretenissent en leur voullenté de rebeller, le duc passa en Hollande atout son armée.