CHAPITRE CEXI

dants que les dicts adversaires venissent combattre, marchèrent en bataille, tous à pied jusques à ladite place, pour le grand désir que ils avoient de combattre Et, quant che vint à l’aborder ensemble, les dessusdits adversaires se départirent sans combattre; et s’en allèrent ceulx de cheval à course de leurs chevaulx, et ceulx de pied se frappèrent dedans la forest ; et là y eult desdits adversaires, que morts que prins, environ trente. Si convint les seigneurs dessusdits retourner à pied, comme dessus est dict; et iceulx comtes et seigneurs revenus, trouvèrent les adversaires en belle ordonnance et bataille, et à cheval, entre la ville et la forest ; et là se monstrèrent bien gens de guerre. Si commencha une escarmouche entre les deulx batailles. Et, pour vray dire, se ils eussent combattu l’ung l’autre, la bataille eult esté mortelle, car la besongne estoit très hayneuse, et si avoit des vaillants hommes d’ung costé et d’aultre. Mais à peine se pouvoit-i] faire que il y eult bataille; car les gens du duc ne voulloient combattre que à pied, et les adversaires à cheval; si estoit chascun sur sa garde. Mais, pendant icelle escarmouche, les dessusdits adversaires avoient envoyé de leurs gens de pied dedans la ville de Compiengne, lesquels, avecques ceulx de la ville, assaillirent la bastille où le seigneur de Créquy, messire Florimont et messire Jacques de Brimeu estoient. Or ne pouvoient ceulx de la bastille veoir leurs gens, estants en bataille, comme dessus est dict; et, pour che, avoit esté dict à ceux de Créquy et de Brimeu, que ils feissent gecter canons, se on les assailloit. Lesquels signes ne furent point ouis; et, par ainsi, ne fut point ladicte bastille secourue; et fut prinse de bel assault. Et furent prins les seigneurs de Brimeu et Créquy, et pluiseurs aultres; et furent morts bien trente de leurs gens. Entre lesquels y fut mort le seigoeur de Limères, le chastelain Archambault de Brimeu; et tantost apprès fut porté à la congnoissance des comtes de Hontinton, de Ligny et d’Arondel, lesquels en furent terriblement troublés ; et non sans cause, car ils avoient faict une grant perte. Et lors feirent par un roy d’armes sommer leurs ennemis et requérir la bataille. Mais ils ne feirent à che propos point de responce. Si demourèrent les dessusdits en bataille, l’ung devant l’aultre, jusques aulx vespres, que les adversaires entrèrent dedans ladite

ville, et y bouttèrent grant foison de vivres que ils avoient amenées sur chevaulx en main; et les gens du duc, tous ensemble, repassèrent la rivière d'Oise à ung pont faict de batteaulx, qui pour lesdictes bastilles et logis avoit esté faict.

Le lendemain bien mattin, les adversaires issirent de la ville, et allèrent assaillir trois bastilles qui estoient près de la ville, et en prinrent les deulx, et la troisiesme se tint; et che faict, lesdicts adversaires se retrayrent dedans la ville. Et ce venu à la cognoissance du conte de Ligny, qui n’avoit nulle voullenté de partir, s’en alla où lesdictes bastilles avoient esté gardées; et faisoit son compte de là attendre le duc auquel ilavoit mandé l'adventure du jour. Et tout ainsi que le comte de Ligny ordonnoit remectre gens dedans lesdictes bastilles, on lui vint dire que les deulx comtes d'Angleterre, de Hontinton et d’Arondel s’en voulloient aller, en disant que le paiement de leurs gens estoit failli, passé avoit huit jours, et que sans argent ne demourroient plus. Pour quoy le comte de Ligny, tant dolant que plus ne povoit, alla devers les susdits comtes d'Angleterre, et les requit qu'ils voulsissent demourer jusques atant que on fust revenu de devers le duc; mais ce ne vouldrent-ils point faire, et se conclurent d’eulx partir. Lors tint le comte de Ligny conseil avec la noblesse qui avecques luyestoit. Sy fut advisé que, puisque on ne pouvoit faire demourer lesdits Anglois, qui avoient la plus grosse compaignie, que bonnement ledict comte de Ligny ne povoit demourer sans grant dangier, attendu que le duc estoit en Flandres; parquoi ne polroit venir là que ne fust bien hault jour. Et sembla que mieulx valloit que il se partist avecques les deux comtes dessusdits, que là demourer à si petit nombre de gens qu’il avoit. Sy fut conclud que il partiroit; qui lui feit très amère desplaisance; et partirent tous ensemble et laissèrent leurs bastilles et logis; et ainsi demoura ladicte ville sans estre prinse.