CHAPITRE CLXI

Du trespas du duc Philippe de Brabant; et comment le duc de Bourgongne print possession de la duché; de pluiseurs faicts d'armes quy se firent durant le siége de Compiengne ; et comment il fut délaissé.

Or est vray que, le quinziesme jour du mois d’aoust, vindrent nouvelles au duc que Phi-

lippes, duc de Brabant, son cousin germain, estoit allé de vie à trespas; et, pour icelle cause, se partist le duc de son logis, pour aller audict pays de Brabant, lequel pays, par le trespas de sondict cousin, luy estoit escheu; pourquoy il alla prendre la possession dudict pays, et ordonna le comte de Ligny comme chief dudit logis de Compiengne; et si demourèrent les deulx comtes d’Angleterre dessus nommés, et estoient de trois à quatre mille combattants. Au mois de septembre ensuivant, après le partement du duc, le comte de Ligny, messire Hue de Lannoy, le seigneur de Créquy, et pluiseurs aultres, passèrent la rivière d'Oise, assez près de Compiengne, à ung pont faict de bateaulx, pour asségier ladicte ville; car encore n’estoitelle point asségiée, ne n’y avoit siége que d’un costé, et par bastilles, assez près de ladicte ville, bien garniesde gens de guerre. Les deulx comtes d'Angleterre ne se bougèrent de leurs logis, lesquels estoient à ung village nommé Venettes, à ung quart de lieue de la ville; et quand lesdits chevaliers furent passés ladicte rivière, ils advisèrent que à si petit nombre de gens que ils estoient, veu le grant tour de la ville, ils ne pouvoient asségier ladicte ville tout autour. Si ordonnèrent à faire une bastille devant la plus forte porte de ladicte ville, du costé de la forest, là où les advenues des adversaires estoient, tant de ravitaillement que d’avoir secours. Si fut icelle bastille faicte et dreschiée devant icelle porte et gardée par le seigneur de Créquy et messire Florimont de Brimeu, chevalliers de l’ordre de la Thoison d’or; et là y eult maintes belles escarmouches, et de grants armes faictes à dreschier ledict bastillon, quy oncques ne fut parfaict. Et dura icelui logis l’espace de cinq mois passés ; et, environ le mois d’octobre, s’assemblèrent les adversaires du duc, jusques au nombre de quatre mille combattants, ou plus, et vindrent ravitailler ladicte ville de Compiengne; et, quand les nouvelles furent venues à ceulx dudict logis, si leur fut acertené que iceulx venoient pour combattre; et lors les comtes de Hontinton, Ligny, Arondel, et messire Hue de Lannoy, ordonnèrent leurs gens pour combattre; et furent les quatre bastilles fermées de bonnes gens de guerre pour les garder. Si arrivèrent les susdits adversaires en une place environ une petite lieue de ladicte ville ; et les seigneurs dessusdits sachants leur venue, cui-