CHAPITRE CLXIT
Et tantost apprès, les Liégois allèrent mettre le siége devant la ville de Bouvingnes, en la comté de Namur, où estoient envoyés, deulx gentilshommes de par le seigneur de Croy, nommés Sandras de Soier et Morlet de Renty, et pluiseurs aultres Compaignons de guerre. Si estoient les Liégois bien trente mille hommes; et dura le siége environ vingt-six jours; et là y eult maintes belles escarmouches; et firent les Liégois trois ou quatre assaulx au bolverq de la tour ; mais ceulx de dedans se deffendirent si vaillamment que lesdicts Liégois n’y peurent rien faire; et finablement levèrent leur siége sans conquester la ville. Et durant icellui siége, les Liégois avoient laissé, pour garder le pays de Hasebain, neuf mille hommes ou environ, tant de cheval comme de piet. Si est vray que le seigneur de Croy chevauchoit souvent, tant sur ceulx dudit siége comme sur ceulx qui gardoient ledict pays de Hasebain, là ‘où il fist maintes belles escarmouches. Et tantost apprès, ledict seigneur envoya Jehan de Floron, et Allemand de Flesin, pour garder la ville de Vallecourt, en la cité de Namur. Mais iceulx n’eurent mie conseil de la tenir ; ains s’en partirent et la habandonnèrent; et les Liégois tantost apprès y entrèrent et la pillèrent, et puis y bouttèrent les feulx. Apprès ces choses faictes, les Liégois se retrayrent en leur pays et bonne ville de Liége; et ne demoura tenant les champs que les neuf mille hommes qui gardoient le pays de Hasebain, sur lesquels le seigneur de Croy et ses gens portoient de grands dhommaiges, et boutoient les feulx en pluiseurs lieux du pays de Liége. Tantost apprès, une compaignie de Liégois firent rencontre de messire Jehan de Croy et de pluiseurs aultres chevalliers et aultres gens; et desconfirent lesdicts Liégois ; et y en eult, que morts que prins, bien quatre cents; et là furent faits chevalliers le seigneur de Lannoy et le bastard Jehan de Namur; et les fist chevalliers messire Jehan de Croy. Et durèrent icelles guerres ès pays de Liége et de Namur les moisde juillet, aoust et septembre, lesquelles furent très rigoreuses, et si feurent moult dhommageables à chascune des parties.
En la fin dudict mois de septembre, l'an mil quatre cent trente, furent prinses abstinences de guerre entre lesdicts pays de Liége et de Namur, et ce pour cause de la mortalité d’impédimie, laquelle estoit si grande au pays de
MÉMOIRES DE SAINT-REMY
Namur et au pays d'environ que c’estoit pitié,
et dont le scigneur de Mamines, chevallier dudict ordre de la Thoison d’or, fina vie par-mort, dont ce fut dhommaige, car il estoit vaillant chevallier. Et par le traictié des susdictes abstinences, fut appoinctié que une journée se tiendroit à Malines, où lesdits Liégois seroient ouys par le duc, et feroient offres pour estre receus à traictié de paix, se faire se povoit.
