CHAPITRE CLXWVII
fut passée, le greffier et secrétaire de l’ordre se mist à l'endroit des tableaux au milieu des frères mesdits seigneurs de l’ordre, et là fut faicte par lui une moult belle ct pitoiable recommandation à mondict seigneur le duc, et à eulx tous, pour et au nom dudict chevalier, seigneur de Mamines, que Dieu pardoint ! dont les armes estoient allendroit de son siége, comme dict est; et le fist en la manière qui s’enssuit.
« Très excellent et très puissant prince, mon très redoubté seigneur, le fondateur, chef et souverain de ceste honnorable et léable ordre de la Thoison-d'Or, et vous, nobles et honnourés seigneurs, chevalliers, frères et compaignons dudict ordre, cy présents maintenant à che service que l’on faict pour les trespassés; à l'intention de vous, monseigneur, affiert faire singulière et espécialle mention de l'ame du noble et vaillant chevallier messire Robert de Mamines, en son vivant frère et compaignon d’icellui ordre, qui trespassa à Namur, en vostre service, contre vos ennemis, lan passé, et si vaillamment et grandement servy son naturel prinche, vous, monseigneur, en vos guerres, voyaiges, armées, et aultrement en maintes manières, a faictes de haultes proesses. »
Et ainsy, par moult belles, dévottes et très nottables ordonnances, se parfist le sainct serviche divin, et puis, par la manière que j'ai dict dessus, le duc et les seigneurs de l'ordre, en leur nottable et honnourable ordre et ordonnance, se partirent de l’église et retournerent audit hostel du duc, et à l’heure du séoir, à table, mondit seigneur le duc en son siége moyen, et mesdicts seigneurs chascun en son degré, comme dessus a esté dict, en leurs habits de doeul, et puis, le disner passé, pour tout le jour furent ainsy vestus jusqu’à la nuit; et lendemain, le duc et les seigneurs dudict ordre furent vestus de tels habits qu'il leur plust à l'église, où ils furent ensemble ouyr la messe de Nostre-Dame, et entrèrent en chappitre, où ils furent par ordre et en manteaulx dudict ordre, où ils esleurent deulx chevalliers pour estre frères et compaignons dudict ordre; c’est assavoir le comte de Meurs, et messire Simon de Lalaing, comme il sera dict chi appres.
