CHAPITRE CLXXXI

- Comment le duc de Bourgongne envoya gaster le pays de Beaujololis; et comment il retourna en ses pays de Flaudres et de Brabant.

Tantost après icelle feste, le duc retourna à Dijon ; et fut le dix-huitiesme jour de fevrier où il fist assembler pluiseurs gens de guerre, lesquels il ordonna à estre en la compaignie du bastard de Sainct-Pol et de messire Bauldot de Noyelle, et lesenvoya au pays de Beaujolois et ès marches d'environ; et entrèrent audict pays de Beaujolois lesdicts seigneurs, et y firent de grands dommages, et y prinrent pluiseurs forteresses, et bouttérent les feux en pluiseurs lieux. Sy ne trouvèrent nul qui se offrist à les combattre, et ainsy retournèrent en Bourgongne.

Le darrain jour de mars, se partist le duc de Dijon, pour aller en ses pays de Brabant, de Flandres, Arthois et Haynault. Or est vray que, avant son partement, le duc ordonna, par bonne délibération de conseil, que la duchesse demourroit ès pays de Bourgongne, ayant le gouvernement des dessusdicts pays; et messire Anthoine et messire Jehan de Vergy seroient capitaines du pays. Après icelles ordonnances se partist le duc pour retourner en Flandres, et arriva en sa ville d'Arras, le dixseptiesme jour d’apvril ensuivant 1434, et de là à Lille, Bruges et Gand, et en pluiseurs aultres villes. En ce temps, le comte de Ligny print une forte abbaye, nommée Sainct-Vincent, auprès de la cité de Laon; et estoit ladicte abbaye sy près de ladicte cité que de canons et serpentines ils jectoient tous les jours lung dedans l’aultre. A merveilles coustoit audict comte de Ligny à garder icelle place en espérant de mettre la cité en subjection, mais rien n’y vallut; ains par certain appoinctement se partit le comte de Ligny de Jadicte place, et feurent ceulx de ladicte cité tenus d’abattre icelle forteresse, laquelle chose ils firent à grand’ deplaisance, et feut toute demolie.

MÉMOIRES DE SAINT-REMY