IH® P

Pautruy : là où le pauvre Nicias qui avoit bien la mesme intention, et non pas la mesme grace de persuader avec sa parole, qui estoit comme un mords trop doulx, tascha bien de refrener et arrester la cupidité du peuple, mais il n’en peut venir à bout, ains futemporté malgré luy, et entrainné à col torts par la violence du peuple, jusques en la Sicile.

On dit communement par un ancien proverbe, « Qu’il ne fault pas tenir le loup par les aureilles : >» mais c’est un peuple et toute une cité qu’il fault principalement prendre par les aureilles, non pas aller chercher d’autres prises lourdes et grossieres, pour attirer et gaigner une commune, ainsi que font ceulx qui ne sont pas suffisamment exercitez en cest art d’eloquence, les uns tirans le populaire par la panse, et en luy faisant des bancquets, les autres par la bourse, en luy donnant de l’argent, ou luy faisant veoir des jeux, des danses ou des combats d’escrimeurs à outrance, qui n’est pas tant mener que trainer par flatterie un peuple: car le mener proprement est le persuader par force d'eloquence, là où ces autres allechemens de populace ressemblent proprement aux appasts que lon fait pour prendre les bestes brutes.

Puis qu’il est donc ainsi, que le principal instrument d’un sage gouverneur est la parole, il fault tout premierement qu’elle ne soit point affettée, ny pompeuse et fardée, comme seroit celle d’un jeune charlatan et triacleur, qui voudroit monstrer son eloquence en pleine assemblée de foire, composant son oraison des plus beaux, plus doulx et plus elegans termes qu’il pourroit choisir ; ny aussi tant elabourée et travaillée, comme disoit Pytheas, qu’estoit celle de Demosthenes, luy reprochant qu’elle sentoit l’huile de la lampe : ny pleine de trop de curiosité sophistique, de raisons trop aiguës et subtiles, ou de clauses exactement mesurées à la regle et au compas, ne plus ne moins que les musiciens veulent qu’au touchement des cordes il se sente une affection doulce, non pas ua rude battement : aussi au langage du sage gouverneur, soit qu’il conseille, ou qu’il ordonne quelque chose qu’il apparoisse non une ruze, ny un artifice d’orateur, non une affectation de louange d’avoir parlé doctement, subtilement, et ingenieusement, mais soit vraye magnanimité, d’une franchise de remonstrance paternelle, qu’il sente son pere du public, plein de bon sens, de prevoyance soigneuse, ayant la grace attrayante conjoincte avec

l’honeste dignité, en termes graves, raisons pertinentes et vraysemblables.

L'homme de gouvernement troussera bien aucunefois quelque mot de rencontre, et quelque traict de risée, mesmement si c’est pour chaslier et provoquer quelqu'un modestement, et avec utilité, non pas le taxer ne picquer outrageusement en son honneur avec gaudisserie : mais cela est principalement trouvé bon et loué, quand il se fait en repliquant et rendant le change à quelqu'un, car de commencer et le faire de propos deliberé et premedité, c’est à faire à un plaisant, qui cherche à faire rire la compagnie, outre ce que l’on en encourt opinion de malignilé, comme il y en avoit ès brocards de Ciceron et de Caton le vieil, et d’un Euxitheus qui estloit familier d’Aristote, car ceulx là ordinairement commancent les premiers à se mocquer : mais quand on ne fait que repliquer, la soudaineté de l’occasion donne à celuy qui fait la rencontre, pardon et bonne grace, tout ensemble, comme feit Demosthenes à un qui estoit souspeconné d’estre larron, qui se mocquoit de ce que Demosthenes veilloit toute la nuict pour estudier et escrire: « Je sçay bien, dit-il, que je te fasche fort de ce que je tiens la lampe allumée toute la nuict. » Aussi n’eust pas mauvaise grace ce que respondit Xenaetus à ses citoyens qui se mocquoient de luy, de ce qu’estant leur capitaine il s’en estoit enfuy : « Avec vous, mes beaux amis, » respondit-il.

On a aussi en admiration la brefveté du langage de Phocion : tellement que Polyeuctus faisant jugement de luy, disoit, « que Demosthenes estoit bien un très grand orateur, mais que Phocion sçavoit mieulx dire, pource que son langage en peu de paroles contenoit beaucoup de substances : » et Demosthenes qui ne faisoit compte de tous les autres orateurs de son temps, quand Phocion se levoit pour parler après luy : « Voilà, disoit-il, le coupperet de mes paroles qui se leve. »

Mets donc peine le plus qu’il te sera possible, quand tu auras à parler devant le peuple de bien propenser ce que tu auras à dire, pendant que tu le pourras faire seurement, et non pas user de paroles vaines et vuides de sens, sçachant que Pericles mesme, ce grand gouverneur nrioit aux dieux avant que de monter en chaire, qu’il ne luy eschappast de la bouche aucune parole, qui ne servist à la matiere dont il devoit traitter : toutefois encore se

fault il exerciter à scavoir respondre et repliquer promptement : car les occasions passent en un moment, et apportent beaucoup de cas soudains en matiere de gouvernement : au moyen de quoy Demosthenes, pour ny estre pas bien fait, estoit reputé inferieur à plusieurs autres de son temps, pour ce que quand l'occasion se presentoit, bien souvent il se tiroit en arriere et se cachoit sil n’avoit bien premedité ce qu'il avoit à dire. Et Theophrastus escript qu’Alcibiades voulant non seulement dire ce qu’il falloit, mais aussi ainsi qu’il le falloit restivoit bien souvent en parlant, et quelquefois demouroit tout court, pendant qu’il cherchoit en luy mesme, el composoit les termes propres ès quels il devoit dire : mais celuy qui prent occasion de se lever pour parler des occurences mesmes, et des temps qui se presentent soudainement, il estonne merveilleusement et mene comme il veult une commune : comme Leon Byzantin vint un jour à Athenes, envoyé par ceulx de Constantinople pour faire des remonstrances de pacification aux Atheniens, lesquels estoient tombez en grandes dissentions les uns contre les autres: ‘or estoit il fort petit, de maniere que quand le peuple le veit sur la chaire aux harengues, chascun s’en prit à rire, de quoy luy s’appercevant, « Et que feriez-vous doncques, dit-il, si vous voyiez ma femme, qui à peine me vient jusques au genouil? » Alors la risée fut encore bien plus grande de toute l’assemblée : « Et neantmoins tous petits que nous sommes, dit-il, quand nous entrons en querelle l’un contre l’autre, la ville de Byzance n’est pas assez grande pour nous contenir tous deux. » Et Pytheas l’orateur, lorsqu'il contredisoit aux honneurs que l’on decernoit à Alexandre, comme quelqu’un luy dist, « Comment, ozes tu bien parler de si grandes choses, toy qui es si jeune? Et quoy, dit-il, Alexandre que vous faites un dieu par voz decrets. est encore plus jeune que moi. »

Se ee LT nee AS LS ne De LS

Repas des Lacédémoniens.

Lycurgus voulant persecuter la superfluité et les delices, afin d’exterminer de tout poinct la convoitise d’avoir et de s’enrichir,

il feit une ordonnance nouvelle, tres belle, qui fut celle des convives, par laquelle il voulut et ordonna, qu’ilz mangeassent en- . semble de mesmes viandes, et de celles qui estoient notamment specifiées par son ordonnance, par laquelle il leur estoit expressement defendu de manger à part en privé dessus riches tables et licts somptueux, en abusant du labeur des excellents ouvriers, et des frians cuisiniers, pour s’engresser en secret et en tenebres, comme lon engresse les bestes gourmandes : ce qui gaste et corrompt non seulement les conditions de l'ame, mais aussi les complexions du corps, quand on luy lasche ainsi en abandon la bride à toute sensualité, et à toute gloutonnerie : dont il advient qu’il a besoing puis après de beaucoup dormir, pour cuire et digerer ce qu'il a trop pris de viande, et veult estre aidé de baings chaulds, de long repos, et du traittement ordinaire qu'il fault à un malade.

Ce fut doncques chose grande à luy que d’avoir peu faire cela, mais encore plus d’avoir rendu la richesse non subjette à estre desrobée, et moins encores à estre convoitée, comme dit Theophraste, ce qu’il feit par le moyen de ce statut. de les faire manger ensemble avec si grande sobrieté en leur vivre ordinaire. Car il n’y avoit plus moyen d’user ny de jouir, non pas de monstrer seulement sa richesse à qui en eust eu, veu que le pauvre et le riche estoient contraincts de se trouver en mesme lieu, pour y manger de mesmes viandes : tellement que ce que l’on dit communement, que Pluto, c’est à dire, le dieu des richesses, est aveugle estoit vray en la seule ville de Sparte entre toutes celles qui furent onques au monde: car il y estoit gisant par terre comme une peinture sans ame qui n’a aucun mouvement : attendu qu’il n’estoit pas loisible de manger devant que de venir ès sales publiques à part en sa maison, et puis s’en venir par contenance tout saoul au lieu du convive : car chascun avoit l’œil à regarder expressement ceulx qui ne beuvoient et ne mangeoient pas de bon appetit en la compagnie, et les en blasmoit et reprenoit ou comme gourmands, ou comme desdaignans par delicatesse de manger en commun avec les autres : de sorte que ce fut, à ce que lon dit, l’ordonnance qui plus‘ fascha les riches, entre toutes celles que lors establit [,ycurgus, et pour laquelle ilz crierent et se courroucerent plus‘ contre luy, jusques à ce que voyant qu'ilz

1 Gr. $ 12.

se ruoient tous ensemble contre luy, il fut contrainct de s’en fouyr de la place. Si gaigna le devant et se jetta en franchise dedans une eglise, avant que les autres le peussent atteindre, excepté un jeune homme nommé Alcander, lequel n’estoit point au demourant de mauvaise nature, sinon qu’il estoit un peu prompt à la main, et cholere : et poursuivant Lycurgus de plus près que les autres, ainsi comme il se cuida retourner devers luy, il luy donna un coup de baston sur le visage, dont il luy creva un œil. Mais pour cela Lycurgus ne fleschit point, ains se presenla la teste levée à ceux qui le poursuivoient, leur monstrant son visage toul ensanglanté, el son œil crevé : dont ilz eurent tous si grande honte, qu’il n’y eut celuy' d’eulx qui ozast ouvrir la bouche pour parler contre luy : ains au contraire, luy livrerent entre ses mains Alcander, qui l’avoit frappé, pour en faire punition telle que bon luy sembleroit, et le convoyerent tous jusques en sa maison, monstrant qu’ilz estoient bien marris de son inconvenient. Lycurgus en les remerciant les renvoya, et feit entrer Alcander en sa maison avec lui, là où il ne mesfeit ne mesdit jamais d’une parole, ains luy commanda seulement qu’il le servist, faisant retirer ses domestiques qui avoient accoustumé de le servir ordinairement. Le jeune homme qui n’estoit point lourdaut de luy mesme, le feit vouluntiers, sans rien repliquer au contraire* : et quand il eut demouré quelque temps auprès de luy, estant toujours à l’entour de sa personne, il commencea à congnoistre et gouster la bonté de son naturel, et laffection et intention qui le mouvoit à faire ce qu’il faisoit, l’austerité de sa vie ordinaire et sa constance à supporter tous travaux, sans jamais se lasser : dont il se prit à aimer et honorer fort affectueusement, et depuis alla preschant à ses parents et amis, que Lycurgus n’estoit pas ainsi rude ne rebours comme il sembloit de prime face, ains estoit le plus doulx et le plus aimable envers les autres qu’il estoit possible. Voilà comment Alcander fut chastié par Lycurgus, et la punition qu’il en receut : c’est, que de mal conditionné jouvenceau, oultrageux et temeraire qu'il estoit au paravant, il devint homme très sage et très moderé.

Les enfans mesmes alloient à ces convives ne plus ne moins qu’à des escholes d'honneur et de temperance, là où ilz enten-

1 Gr. Ç 59. |

2 Lex.

doient de bons et graves devis touchant le gouvernement de la chose publique, soubs maistres qui n’estoient point mercenaires, et y apprenoient à se jouer de paroles les uns avec les autres, et à s’entremoquer plaisammant, sans toutefois piquer aigrement ny gaudir deshonnestement, et à ne se courroucer point pour estre semblablement moquez: car c’est une qualité, entre autres. fort propre aux Lacedaemoniens que d’endurer patiemment un traict de moquerie : toutefois s’il y avoit aucun qui n’y prist point de plaisir, il falloit seulement qu’il priast l’autre de s’en abstenir et incontinent il cessoit. Mais c’estoit une chose ordinaire qu’à tous ceulx qui entroient dedans la sale du convive, le plus vieil de la compagnie leur disoit. en leur monstrant la porte, « Ïl ne sort pas une parole hors de ceste porte... »

La plus exquise viande que lon servist en ces convives là, estoit celle qu’ilz appelloient le brouet noir, tellement que quand il y en avoit, les vieillards ne mangeoient point de chair, ains la laissoient toute aux jeunes hommes, et eulx à part mangeoient le brouet. Il y eut jadis, un roy de Pont, qui pour gouster de ce brouet noir, achepta expressement un cuisinier Lacedaemonien : mais quand il en eut une fois tasté, il s’en fascha ‘ incontinent : et le cuisinier lui dit : « Sire, pour trouver ce brouet bon, il se faudroit premierement estre baigné dedans la riviere d’Eurotas. » — Après qu’ilz avoient sobrement beu et mangé ensemble, ils s’en retournoient sans lumiere chascun en sa maison : car il ne leur estoit pas loisible d’aller ny là ny ailleurs avec de la chandelle, afin qu'ils s’accoustumassent à marcher hardiment la nuict et en tenebres par tout. Tel estoit l’ordre et la manière de leurs convives.

Laconisme.

Il m'est bien advis que les Laconiens, en leur maniere de parler, n’usent pas de beaucoup de langage, mais qu’ilz touchent très bien au poinct, et qu’ils se font très bien entendre aux escoutans :

1 Lex.

et si me semble que Lycurgus luy mesme estoit ainsi court et agu en son parler, à ce que l’on peull conjecturer par quelques sienes responses que lon treuve par escript, comme fut celle qu’il feit à un, qui luy suadoiït d’establir en Lacedaemone un gouvernement populaire, là où le petit eust autant d’authorité que le grand: « Commence, luy dit il, à le faire toy mesme en ta maison. »

Semblablement aussi ce qu’il respondit à un autre, qui luy demandoit pourquoy il avoit ordonné que lon offrist aux dieux choses si petites et de si peu de valeur : « Afin dit il, que nous ne cessions jamais de les honorer. » Et ce qu’il dit une autre fois touchant les combats, qu’il n’en defendoit à ses citoyens si non ceulx, ès quelz on tend la main, c’est à dire, où l’on se rend.

On treuve aussi aucunes telles responses, en quelques lettres missives qu'il escrivoit à ses citoyens, comme quand ilz luy demanderent : « Comment nous pourrons nous defendre contre noz ennemis ? » Il leur respondit, « Si vous demourez pauvres, et que l’un ne convoite point avoir davantage que l’autre. » Et en une autre missive, où il discourt, s’il estoit expedient de fermer la ville de murailles : « Comment, dit-il, pourroit on dire que celle ville soit sans muraille, qui est ceinte et environnée d’hommes tout à lentour, et non pas de brique. » Toutefois quant à ces lettres là, et autres semblables que lon monstre de luy, il est mal aise de resoudre, si lon doibt croire ou decroire qu’elles soient de luy.

Mais quant à ce, que le beaucoup parler ‘ fust repris et blasmé des Lacedaemoniens, on le peult evidemment monstrer par les mots aguz que quelques uns d’entre eulx ont autrefois respondu*. Le .… roi Leonidas dit un jour à quelcun qui devisoit, et alleguoïit beaucoup de bonnes choses, mais hors de temps et de saison : « Amy, tu tiens sans propos beaucoup de bons propos. » Et Charilaüs, le nepveu de Lycurgus, interrogué pourquoy son oncle avoit fait si peu de loix : « Pource, dit-il, qu'il ne fault pas beaucoup de loix à ceulx qui ne parlent pas beaucoup. » Et Archidamidas dit à quelques uns, qui reprenoient l’orateur Hecataeus de ce, qu’ayant esté convié à soupper en un de leurs convives, il n’y parla point tout le long du soupper : « Celuy, dit il, qui sçait bien parler, sçait aussi quand il fault parler. » Et quant à ce que j’ay dit ail-

‘ Gr. $ 87.

2 Gr. 96.

leurs cy devant, qu’en leurs responses aguës et subtiles, il y avoit ordinairement quelque peu de poincte meslé avec grace, on le peult veoir et cognoistre par ces autres mots icy : Demaratus respondit à un fascheux, qui luy rompoit la teste de questions . impertinentes et importunes, en luy demandant souvent, Qui estoit le plus homme de bien de Lacedaemone : « Celuy, dit-il, qui te ressemble le moins. » Et Agis dit à quelques uns qui hault louoient les Eliens de ce qu’ilz jugeoient selon droict et justice ès jeux Olympiques: « Quelle grande merveille est ce, dit il, si en Pespace de cinq ans les Eliens font un seul jour bonne justice? » Et Theopompus à un estranger, lequel voulant monstrer l’affection qu’il portoit à ceulx de Lacedaemone, disoit : « En nostre ville tout le monde m'appelle Philolacon, » c’est à dire amateur des Lacedaemoniens : « Il te seroit plus honneste, respondit il, d’estre surnommé Philopolites, » c’est à dire, aimant ses citoyens. Et Plistonax filz de Pausanias, comme un orateur Athenien appelast‘ les Lacedaemoniens grossiers et ignorans : « Tu dis vray, luy respondit il, car nous sommes seuls entre les Grecs, qui n’avons apprins rien de mal de vous. » Et Archidamidas à un qui luy demandoit, combien ilz estoient de Sparliates : « Assez, luy respôndit il pour chasser les meschans. » | |