COMMISES

que ce ne fust du sceu du roy, exceptez quelque maistre d'hostel et gens de cette sorte qui n'alloient point devers luy. Est il donc possible de tenir un roy, pour le garder plus honnestement, en plus estroicte prison que luy raesmes se tenoit? Les caiges ou il avoit tenu les aultres avoient quelques huyt piez en carré, et luy, qui estoit si grant roy, avoit une bien petite court de chasteau a se pourmener; encores n'y venoit il gueres, mais se tenoit en la gallerie, sans partir de la, sinon que par les chambres alloit a la messe sans passer par la dite court. Vouldroit l'on dire que ce roy ne souffrist pas aussi bien que les autres, qui ainsi s'enfermoit et se faisoit garder, qui estoit ainsi en peur de ses enfans et de tous ses prouchains parens, qui changeoit et muoit de jour en jour ses serviteurs et nourriz ', et qui ne tenoient biens ny honneur que de luy, et en nul d'eulx ne se osoit fier, et s'enchainoit ainsi de si estranges chaynes et clostures? Si le lieu estoit plus grant que d'une prison commune, aussi estoit il plus grant que prisonniers communs.

On pourroit dire que d'autres ont esté plus suspectionneux que luy, mais ce n'a pas esté de nostre temps, ne paravanture homme si saige que luy, ny ayant si bons subjectz. Et avoient ceulx la, paravanture, esté cruels et tyrans; mais cestuy ci n'a faict mal a nul qui ne luy eust faict quelque offense.

Je n'ay point dit ce que dessus pour seullement parler des suspections de nostre roy, mais pour dire que la patience qu'il a porté en ses passions, semblables a celles qu'il a fait porter aux aultres, je la repute a pugnition que Nostre Seigneur luy a donnée en ce monde pour en avoir moins en l'aultre, tant es choses dont j'ay parlé comme en ses malladies, bien grandes et douloureuses pour lui, et qu'il craignoit beaucoup avant qu'elles luy advinssent; et aussi aflin que ceulx qui viendront après