CHAPITRE GXLVI

Des remonstrances que le duc de Bethfort, frère du duc de Clocestre, feit faire au duc de Bourgongne, pour empeschier le combat; à quoy ledit duc de Bourgongne ne se volt consentir. Toutteffoiz riens nen ensuyvit; et ne retourna oncques puis, en France, ledit duc de Clocestre, fors que autour de Callais.

Après ce que le duc de Bethfort eust esté bien adverty, au long, des escriptures et débatz d'entre le duc et le duc de Clocestre, et du jour que ilz avoient prins pour combattre, envoya notable ambassade de ses gens devers le duc, pour le remercyer de l'onneur qu'il luy avoit faict de le prendre son juge à l' encontre de son propre frère, le duc de Clocestre. Et avec ce, lesdis ambassadeurs firent de grandes et honnourables remonstrances au duc affin de l'esmouvoir, et qu'il fust content d'appoinctier avec le duc de Clocestre, sans combattre. De laquelle chose le duc ne vault riens faire, et bien s'attendoit que le duc de Clocestre se trouvasse devant le duc de Bethfort, fort au jour que promis estoit. Mais il en fut aultrement; car oncques puis en France n'entra, au mains plus avant que environ la ville de Callais. Et pour appaisier et mectre au néant icelluy débat, et affin que le jour ne fust entretenu, et aussi pour garder l'onneur des parties, aussi avant que faire se povoit, le duc de Bethfort, lors régent de France, assembla le conseil de Paris et des plus notables et qui mieulx se debvoient congnoistre

en telles matières. Auquel conseil furent veues lettres que les deux ducz avoient escriptes l'un à l'autre. Icelles veues , bien digérées et débattues , et le tout veu, furent de advis tous ensemble que pour telles ou semblable parolles n'y chéoit gaige de battaille. Et là estoient les ambassadeurs des deux ducz de Bourgoingne et de Glocestre présens. Mais, les ambassadeurs du duc, en riens ne se voulloient contenter, ne eulx chargier de riens repourter au duc, leur maistre, de chose qui là eust esté faicte, touchant ladicte matière. Et ceulx du duc de Clocestre furent content; et leur sembloit que le duc de Glocestre, leur maistre, estoit bien deschargié. Et, depuis icelle journée, n'ay point sceu que aultre chose en ait esté faicte; mais on disoit bien, que en termes généraulx, que oncques puis ne amèrent l'xin l'autre.