CHAPITRE CXLVII
Comment le Soudan d'Egipte et de Sirie envahist le roy anime de Cippre, où il feit de gros dommages.
Il est vray que, combien que paix eust esté par l'espasse de xiij ans entre le Soudan, roy de Sirye et d'Egipte, et le roy de Cippre, advint que aucuns maulvais félons et envyeulx firent entendre au Soudan, que le roy de Cyppre n'avoit pas bien entretenue le traictié de la paix ; dont le soudan se esmeult en ire , si fort et si ligièrement, sans soy plus informer, que il manda yj gallées armées, et sans tarder les envoya en Cippre. Et vindrent ariver et descendre au port de Limesson,
laquelle ville par les guerres précédentes eust esté destruicste. Et se prindrent les Sarrasins à entrer ou pays et faire [grosse] ' guerre de feu et de sang, prendrent gens, violèrent églises et ardirent ladicte ville de Limesson. Mais, la tour se tint tant que le roy Janus , de Gyppre , l'eust fait faire bonne et forte ; et se retrayrent layens les crestiens de la ville.
Quant le roy de Gippre fut adverty de ces choses, il mist sus ung chevalier de Cyppre, nommé messire Phelippe Prévost, et lances et aucuns archiers, lesquelz s'en allèrent à Limesson , et fist une escarmuche aux Sarrazins. Or estoit le moys de juillet, que l'air estoit tant chaulx que merveilles; dont advint que, devant ceste escarmuche, messire Phelippe leva sa visière pour soy ung peu esventer; et lors, soudainement il fut féru d'une flesche en l'ueil [qui luy monta au cherveau]2, et cheut là tout mort. Et les Sarrazins, tout incontinent, luy couppèrent la teste et prindrent ses espérons ; puis, se retrayrent en leurs gallées pour le chault, et s'en retournèrent en Surrie à peu de perte, et firent présent au Soudan de la teste et des espérons du capitaine de Cyppre sur une lance, cryant, parmi la ville de Cayre, que ilz avoient occhis le frère du roy de Gyppre, que l'on nommoit Henry prince de Galilée; dont néantmoins ilz mentoient. Pour ceste petite victoire le Soudan et les siens, en grant orgueil, se délibérirent de faire si grosse armée, en la saison prochaine, que pour destruire le royaulme de Gyppre.
Or, estoit en ce temps, en la ville de Damas, ung homme moult renommez de preudhommie et de saincteté que le Soudan tenoit en grant révérence, et estoit cest homme bon amy au roy de Cyppre, secrètement, comme il le monstra depuis; car il s'en alla devers le Soudan et le blasma de ce qu'il eust les gallées envoyés en Cippre; et tant que le Soudan s'en repentist et eust bien volu que bonne paix y eust esté trouvée. Mais doubtant que le roy de Cippre ne se vaulsist point incliner, il n'envoya point devers luy pour ceste cause. Dontprinst, le saint homme sur luy, de envoyer ambassade de son filz mesmes en Cyppre, pour traictier icelle paix. Etarivaà Famagossée que les Géneuois tenoient. Le roy de Cyppre, adverty de ceste ambassade, ne veult souffrir que ilz venissent devers luy; mais y envoya de ses gens, pour savoir quelque chose ilz vouloient dire. Ausquelz les ambassadeurs ne vauldrent riens dire, disant que, seicelluy filz du saint homme povoit parler au roy de Cyppre, bonne paix seroit trouvée au prouffit du roy grandement. Lors, luy dirent les depputez du roy que le soudan avoit fait grant follie de conmenchier la guerre contre le roy de Cippre, et non point seulement contre le roy de Cippre, mais contre toute crestienneté. Et il leur respondy que le soudan estoit bien adverty du gouvernement de la crestienneté , et que le roy de France , qui tousjours avoit esté le chien au grant colier, dormoit pour le temps, et que peu ou néant doubtoit les crestiens. Ainsi dont, s'en retourna à Damas le filz du saint homme, et récita à son père comment le roy de Cippre ne le volu oyr; dont le bon homme devint si mal content que il devint mortel ennemy du roy de Cippre,
et conforta tousjours le Soudan, en luy affermant qu'il auroit victoire du roy de Cyppre.
Au mois d'aoust, mil cccc xxv, le Soudan fist son amas de Sarrazins, et, à grant plenté de galliottes et gallées, et de navires, toutes chargies de gens et d'artilleries, se party de Sirye et vint ariver d'à lez Famagossée. Et, lors, estoit griefment malade le roy de Cyppre, lequel néantmoins ordonna son frère, messire Henry de Lusignan, prince de Galilée, capitaine général du royaulme de Cippre. Lequel se mist en ordonnance, en approchant ses ennemis, lesquelz couroient toute la rivière de Cyppre, à l'endroit de Sirie, en mectant en feu et en ruyne tout le pays où ilz passèrent. Messire Henry qui les poursievoit tousjours, les rataint, ung jour, en ung lieu nommé Salines ; et lors qu'il se fut disposé de leur livrer bataille par mer et par terre, il se trouva abandonné de ses gens tellement que, à peu, luy demoura le quart de ses hommes. Pourquoy, le couvint par nécessité retourner en la cité de Nicosie. Dont, se les Sarrazins en eussent esté advertis, ilz eussent peu aller seurement jusques à la dicte cité ; mais ilz poursievirent tousjours la rivière jusques à Limesson , là où ilz prindrent la tour cl'assault, et prindrent le capitaine et pluiseurs aultres hommes et femmes, et menèrent tout en Sirie. Et, eulx venu devers le Soudan, luy présentèrent le capitaine nommé Ragonnet de Flioul, auquel le Soudan prya moult que il vaulsist laissier sa crestienneté et soy tourner sarrasins, en luy promectant que il le feroit grant seigneur, riche et puissant. Et luy respondit que la loy des Sarrazins estoit faulse, et que il estoit content de morir en la foy crestienne. Et, lors, incontin 8
nent, le Soudan le fîst soyer par le mylieu; dont il morut à grief martire. Et fut, depuis, commune renommée que pluiseurs eurent veu une couronne de feu descendre du ciel ou lieu où le corps dudit capitaine eult esté martirisiés et ars après sa mort.
