CHAPITRE CLXXXIII

Comment Pierre de Luxembourg, conte de Saint-Pol, assiéga la ville de Sainct-W allery , qui luy fut rendue par traictié. Du trespas dudit conte de Saint-Pol, et des emprises et concquestz que messire Jehan de Luxembourg, conte de Ligney, feit sur les François.

Au mois de juing, mil iiijc xxxiij, se party le duc et la ducesse pour aller secourre et visiter ses pays de Bourgongne , ouquel ses ennemis estoient entrez ; et avoient couru par pluiseurs foiz, tant à puissance comme aultrement, où ilz avoient prins et ravis, tant par force comme par traictié ou emblée, pluiseurs villes et forteresses lesquelles ilz tenoient, ainsi que cy après sera faicte mencion. Sy emmena le duc une très grant et noble armée en sa compaignie, et par espécial de pluiseurs lieux de ses pays de Picardie ; et fut son partement de la ville d'Arras ; et à l'environ de ladicte ville fut faicte son assemblée, là où il fut ordonné par le duc et son conseil ce qui s'ensuit. C'est assavoir, que Pierre de Luxembourg, conte de Saint- Pol, seigneur d'Enghien, chevalier de la Thoison d'or, asségeroit une bonne ville nommée Saint- Wallery sur Somme, qui est port de mer ; laquelle, pour ce temps, estoit ravie et raemplie des ennemis du duc, qui luy portoient et faisoient grant contraire et dommage et à tout le pays à l'environ ; et messire Jean de Luxembourg conte de Ligney, aussi chevalier de ladicte

ordre, auroit certain nombre de gens d'armes pour garder la rivière de Somme, que les ennemis n'entrassent èsdis pays du duc, tant Picardie, Artois, comme Flandres et Haynnau.

Or, est vrayque le conte de Saint-Pol, en brief temps après , fist son amas de gens d'armes , là où il y eult une moult grande et noble compaignie; et, environ l'entrée du mois de juillet, il mist le siège devant Sainct-Wallery, là où il fut par l'espasse de cincq sepmaines ou environ; et tant constrains iceulx estans dedens ladicte ville, par force d'armes, que il les concquesta par certain traictié fait entre lui et eulx. Lequel traictié fut tel, que ceulx de ladicte ville averoient jour et temps, durant ung mois, pour combattre ou rendre ladicte ville, et bonnes trêves et abstinence de guerre entre luy et eulx, durant icelluy terme; voire, par ainsi que ledit conte seroit plus fort sur les champs à icelle journée que lesdis adversaires, ilz se renderoient saulfz leurs corps et biens. Et, pour tous leurs prisonniers et habillemens de guerre, ilz dévoient avoir dudit conte la somme de mil salus d'or; et pour tous ces traictiés et accordz entretenir, iceulx de ladicte ville donneront hostages souffissans.

Sy tint ledit conte de Saint-Pol la journée qui fut au xxe jour d'aoust, l'an dessusdit; et furent en sa compaignie sur les champs pour tout le jour, environ vjm combattans, tant des marches de Picardie comme d'Angleterre. Or, est ainsi que ceulx de la ville de Saint-Wallery ne eulrent point de secours , et ne s'y apparut nulz d'eulx à ladicte journée, et se rendirent par la forme dessus dicte. Icelle ville rendue, que avezouy, le conte de Saint-Pol entra en Normendie, à

tout sa noble armée, et mist siège devant une forteresse nommée Monceaux, qui alors estoit emplie des ennemis du duc. Sy se mirent en composition et prindrent journée de rendre ladicte place ou de combattre, le xxe jour d'octobre ensuivant; et de ce faire livrèrent deux gentilz hommes de leur compaignie pour pleiges et hostages de ladicte journée entretenir ou de ladicte place rendre. Il est vray que durant ce temps et devant le xxe jour d'octobre , le conte de Saint-Pol alla de vie à trespas; et tantost après le trespas dudit conte de Saint-Pol, ung capitaine adversaire du duc, appelé La Hyre, acompaignié d'aultres capitaines telz que Poton de Saint-Trailles et aultres, à grant puissance de gens d'armes, passa la rivière de Somme et entra es pays du duc, comme Artois, Haynnau, Vermendois et Gambrésis, et y bouta les feux en pluiseurs villages et églises, et fîst de grans pilleries et prinses de prisonniers.

Lors, estoit en la conté de Saint-Pol le conte de Ligney avec son nepveu, filz dudit deffunct (que Dieu pardoint!), en très grant dueil, pour la mort de son frère, non scachans la venue des adversaires, qui tantost après les nouvelles oyes, fist son assemblée et se mist sus, comme cy après sera dit. Et se retrayerent lesdis adversaires es plus prochaines1 villes et places à eulx obéissans, à tous leurs buttins. Iceulx adversaires avoient nouvellement prins une forteresse nommée Happlencourt, séant sur la rivière de Somme, en laquelle avoit environ 1 ou lx hommes, lesquelz

1 . « La venue des adversaires — es plus prochaines. » Tout ce qui est intermédiaire manque dans l'édition B.

povoient grandement grever ou pays à l'environ. Sy fut ainsi, que le conte de Ligney, à tout une très grosse puissance, alla mectre le siège devant ladicte forteresse de Happlaincourt, et tant les constraint, par force d'armes, queiceulx adversaires se rendirent, à la voulenté dudit conte. Sy les fist tous pendre, excepté cincq.

Durant icelluy siège, qui dura v jours ou environ , lesdis adversaires se mirent ensemble, faisant semblant de vouloir lever le siège. Mais ilz n'en furent pas conseilliès et s'en retournèrent chascun en leurs places. Là furent des chevaliers de l'ordre, avec le conte de Ligney, le seigneur d'Antoing et messire Simon de Lalaing. Ces choses faictes, le conte de Ligney se party et donna congié à ses gens jusqu'au xxe jour d'octobre que ladicte journée de Monceaulx se devoit tenir. Laquelle journée il tint pour et ou nom de son nepveu, filz et héritier de feu le conte Pierre de Saint-Pol, comme sa première armée. Sy y eult une belle compaignie nombrée de v à vj mille combattans; et y furent, de la noble ordre de la Thoison d'or, le seigneur d'Antoing , messire Simon de Lalaing et les iij de Brimeu dessus nommez. Mais, à icelle journée ne se apparut nulz desdis adversaires ; ains laissèrent leurs hostages, comme ilz les avoient livrés, et ne rendirent point la place, ne tindrent promesse nulle qu'ilz eussent faicte. Dont, après icelle journée ainsi passée, chascun de mesdis seigneurs se retrayrent dedens leurs villes, maisons et forteresses.

Ne demoura guaires après, que lesdis adversaires de mondit seigneur le duc, tant de garnison de la cité de Laon comme de là environ, refirent une grosse assem-

blée pour cuidier eschiellier et prendre la ville de Vrevin en Terrasse; mais ilz faillirent à leur emprinse. S y s'en retrayrent, et en retournant bouttèrent les feux en pluiseurs lieux en la conté de Marie; et par espécial, ilz ardirent tous les faubours de la ville; laquelle chose vint à la congnoissance dudit conte, qui estoit en sa ville de Guise. Sy se party hastivement à tout ce qu'il pot avoir de gens, et tyra après lesdis adversaires. Sy les rataint à ung passage, là où ilz cuidoient passer la rivière, assez près de ladicte ville de Marie, et furent prins en desroy et rué jus. Et, là y eult de mors sur place ij° ou environ tant de pied comme de cheval ; et de prisonniers environ lxvj ; lesquelz furent tous pendus, et, la cause, pour ce qu'ilz avoient bouté les feux en la conté de Marie et ailleurs.