i Gruho ». M. P
Jehan de Ghevery ; le seigneur de Saint-Pierre , et messire François de Ghaunay.
Item, avec lesdiz ambassadeurs de France, assavoir le duc de Bourbon, et conte de Richemont, y avoit, pour chascun, xxiiij archiers, bien montés et armés, vestus de robes de livrée à orfavrerie ; et, avec ce, y avoit roys d'armes, héraulx, poursuyvans, trompettes, ménestreux, chappelains, et tous officiers qui appertiennent à estât de princes, moult noblement et richement habilliés ; l'archevesque de Rains, per et chancellier de France, pour le roy Charles dessus nommez, révéramment et richement montés et adournés, à compaignies de vaillans et nobles hommes et clercz, au nombre de xv à xl chevaulx. Le conte de Vendosme estoit moult notablement à compaignie de chevaliers et escuyers, au nombre de xl chevaulx ; le seigneur de La Faïette, maressal de France, noblement montez à xxx chevaulx ; Gristofle de Harcourt moult bien accompaignié de chevaliers, escuiers et aultres, à l chevaulx ou environ ; maistre Adam de Gambray, premier président en parlement , moult bien accompaignié ; [le grant doyen de Paris, moult bien accompaignié]; seigneur Jehan Castenier, l'un des trésoriers de France, moult bien accompaignié. Somme toute, en icelle ambassade de France, pour le roy Charles, ils estoient entre ixc et mil chevaulx ou environ.
La ducesse de Bourgoingne entra le iije jour d'aoust ensuivant, et furent au devant d'elle Brabanchons, Haynnuyers, Hollandois, Flamengs, Artisiens, Picars, Bourguignons, Namurois, et moult d'aultres grans seigneurs et princes ; et, par espécial , les François moult honnourablement, telz que le duc de Bourbon,
le conte de Richemont, l'archevesque de Rains, le conte de Vendosme, Christofle de Harcourt, le maressal de La Faïette et aultres. Et estoient, à son entrée, de xj à xijc chevaulx. Et estoit la ducesse en une litière moult richement dorée, garnie et couverte, acostée des grans ducz et contes, et de v chariotz dorez de fin or, moult richement couvers de draps d'or, emplis de dames, et de damoiselles sur haguenées, au nombre de xij, sieuvans la littière, toutes vestues d'une couleur de noir richement ouvrées d'orfaverie ; et allèrent ainsi, tout au long de la ville, jusques au grant marchié. Et quant elle fut devant les hostelz de mesdis seigneurs de France, elle vault prendre congié d'eulx en les remerciant; et se firent de grans révérences, mais néantmoins ils ne vauldrent arester, ains l'acompaignèrent jusques à l'hostel du duc1; et là prinrent congié, puis retournèrent à leurs hostelz.
Le seigneur de Longueval , baron , vint en ladicte ville d'Arras, le vije jour d'aoust, à xij chevaulx; et estoient tous ceulx de sa compaignie gentilzhommes. Le conte de Saint-Pol et le conte de Ligney y entrèrent, le viije jour d'aoust, acompaignié moult grandement et honnourablement de Thieubault, monseigneur frère audit conte de Saint-Pol, et de chevalerie et escuyers2. Là estoit messire Daviot de Poix ; messire Baudart de Cuvilliers , et le seigneur de Belle Forière ; monsieur Ferande, espaignol; messire Jacques de Lievin, chevalier; et, de gentilzhommes et escuiers richement montez, environ l, et.de chevaulx environ vijxx.
1. « ils ne vauldrent arester jusques à tant qu'ils vindrent à « l'hostel du duc ». M. P.
